Таразда кітапханада Жамбыл Жабаевтың алғашқы жинағы сақталған

Тараздағы кітапханада Жамбыл Жабаевтың ең алғашқы жинақтары сақталған. Жыр алыбының кітаптары өзі қайтыс болған соң бір жылдан соң жарық көрген. 80 жылдық тарихы бар сирек туындыларды іздеп келушілер көп. 

Шоқан Уәлиханов атындағы облыстық кітапханада 270 мыңнан аса кітап бар. Оның мыңнан астамы құнды түпнұсқалы ескі еңбектер. Арасында Жамбыл Жабаевтың ең алғаш басылған жеті жинағы бар. Сирек кітаптар 1946-1947 жылдары Алматы және Мәскеуде басылған. Түпнұсқа туындының бірі 5 бөлімнен тұрады. Жинақта халық ақынының Қазан революциясына дейінгі өлеңдері, соғыс жылдарындағы шығармалары мен айтыстары, 8 поэмасы енген. Сондай-ақ жыр алыбының сирек суреттері де бар.

Эльмира Әбденова, Облыстық әмбебап ғылыми кітапханасының директоры:

- Әрбір кітапханада сақталатын кітаптардың өзінің ережесі бар. Оған тікелей күн түспеу керек. Ол жерде ылғал болиауы керек. Жарықтың өзі де кез келген кітапқа өзінің сондай ережесі бойынша сақталады. Құнды кітап болғаннан кейін бұның түпнұсқасы болғаннан кейін бұл кітап арды оқырманның қолына бермейміз. Оқырмандар бұл кітаптарды тек қана біздің оқу залдарымызда абонементте отырып сол жерде оқып танысуларына болады.

1974 жылы Тараздағы облыстық кітапханада депозитарлық қор ашылған. Сол тұста Қарағанды, Өскемен, Алматы және Қызылордадан құнды кітаптар жиналды. Жамбыл Жабаевтың сирек томдары да сол кезде кітап қорына түскен. Қазір жинақты жан-жақтан іздеп келушілер көп. Олардың қатарында оқушылар бар. Ақын шығармашылығын насихаттау мақсатында түрлі поэзиялық кештер және жарыстар өтіп тұрады.

Қымбат Болтай, оқушы:

- Кішкентай кезімнен бері осы поэзияға жақын болғандықтан осы халық ауыз әдебиетіне жақын болғандықтан осы көне кітаптарды ұстау арқылы көзбен көру маған көптеген әсер қалдырды. Құдды бір музейге келгендей сезім алдым. Сонымен қатар көне бір ескерткіштерді көзбен көру арқылы мен ары қарай осы кітапханаға келіп өзімнің білімімді шыңдайтын боламын.

Биыл айтыс өнері алыбының туғанына 180 жыл толады. Мерейтойға орай облыстық кітапхана ұжымы көшпелі кітап көрмесін ұйымдастырып жатыр. Мектептерден бастау алған жоба шалғай ауылдарға да жетеді. Ақынның атымен аталған аймақта Жамбыл есімі бір аудан, 3 ауылдық округ, 3 елді мекен, 80-нен аса көше мен 10 мектепке берілген. 

Авторлары: Мерей Бает Бақытжан Бапаев Елдар Байділді