Таразда мамандандырылған әскери мектеп ашылды

Таразда ашылған әскери мектеп-интернатқа 180 бала қабылданды. Оңтүстік аймақта алғаш ашылған мамандандырылған оқу ордасына, республиканың кез келген өңірінен келіп оқуға  болады. 

Мектеп жаңа үлгідегі құрылғылармен жабдықталған. Оқушылар әскери біліммен қоса ІТ саласын да меңгеріп шығады. 

Интернатқа биыл 7-8-9 сынып оқушыларын конкурс арқылы қабылдады. Олар алдымен оқу пәндерінен тест тапсырды. Одан соң физикалық нормативтерді орындады. Үздік шыққандары қабылданды. Солардың бірі – Байзақ ауданынан келген Ернұр Дүйсебай.

Ернұр Дүйсебай, кадет:

- Ауылдан көп жақтан келді. Маңғыстаудан келген балалар бар. Әр жақтан келді. Сарысу ауданынан келгендер бар. Мен де өзім Бұрыл ауылынан келдім. Ауыл балаларына үлкен мүмкіншілік берілген. Біз осы мектепті бітіргеннен кейін жоғарғы әскери оқу орындарына түсе аламыз. 

Батыр Төлеген, кадет:

- Мен бала кезімнен әскери адам болуды армандайтынмын. Сондай-ақ мен бұл мектептің ашылғалы жатқанын алғаш рет ата-анамнан естідім. Бұл жерде оқығым келетінін айттым. Осылайша бағымды сынадым және нәтижесінде түстім. Мен бұл жерде оқығанымды мақтан тұтам. 

Оқушылар жатақханамен, тегін тамақпен және толық оқу-тәрбие жағдайымен қамтамасыз етілген. Мұнда түске дейін жаратылыстану-математика бағытындағы пәндер тереңдетіп оқытылады. Сонан соң қоян-қолтық айқас, саптық дайындық пен түрлі әскери жаттығулармен айналысады. 

Рашид Жуанышев,мМамандандырылған Әскери мектеп-интернаты директорының орынбасары:

- Жалғыз осы мектептің қабырғасында ілім түрінде білім алу емес, біз оңтүстік өңірлік қолбасшылығымен тікелей байланыса отырып, тәжірибені де өтеді. Мысалы, саптық алаңда қалай жүру керек, техниканы қалай басқару керек. Олардың міндеттері қандай, мақсаттары қандай деген, осындай бағытта жұмыс жасалады.

Курсанттар сабақтан тыс уақытта робототехника, дронды басқару, жасанды интеллект үйірмелеріне қатысады. Әрі мұнда ағылшын тілі тереңдетіп оқытылады. Әскери қызметкер болуды армандайтын балалар үшін барлық жағдай жасалды.

Әлішер Әзімбай, мамандандырылған Әскери мектеп-интернатының директоры:

- Әскери мектеп-интернатына қабылдау конкурстық негізде жүргізіледі. Қабылданатын оқушылардың 15 %-на мынау әлеуметтік осал топтан шыққан отбасылардың балаларына жеңілдік қарастырылған. Яғни көпбалалы отбасынан шыққан сондай-ақ ата-ананың қамқорлығынсыз қалған балалар бізге конкурстық негізде бірақ жеңілдік арқылы қабылданады.

Мектепті тәмамдаған түлектер қорғаныс саласындағы жоғары оқу орындарына түсе  алады. Алдағы уақытта әскери мектеп-интернатқа қазақтың даңқты қолбасшысы, халық қаһарманы Бауыржан Момышұлының есімін беру жоспарланып отыр. 

Авторлары: Мерей Бает Бақытжан Бапаев Елдар Байділдә