Таразда өрт және құтқару техникасының көрмесі өтті

23 жастағы тараздық өрт сөндіруші Ислам Мұратов жас та болса көпке үлгі.

Спортпен шұғылданады. Одан бөлек құтқарушы қызметін таңдағандарға тәлімгерлік етеді. Ол өрт сөндіру бөлімінде жұмыс істеген аз уақыт ішінде батылдығымен көзге түсті. Еңбегі еленді. Таразда Төтенше жағдайлар министрлігінің 30 жылдығына орай өткен шарада ерлігімен ерекшеленген құтқарушылар марапатталды. Өрт және құтқару техникаларының көрмесі өтті.

Ислам Мұратов бала кезінен адамдарға көмектесуді армандаған. Ол әскерден келгеннен кейін іріктеуден өтіп, Тараздағы №1 мамандандырылған өрт сөндіру бөліміне жұмысқа тұрды. 3 жылдан бері өрт сөндіруші болып еңбек етеді. Ислам осы уақыт аралығында жазатайым жағдайға ұшыраған ондаған адамның өмірін құтқарып қалды. Өзі бұл салада спорттың көп көмегі тигенін айтады. Жауынгерлік жекпе-жек түрімен шұғылданады. Бос уақытында балаларды жаттықтырады.

Ислам Мұратов, №1 мамандандырылған өрт сөндіру бөлімінің құтқарушысы:

- Оқыс оқиға кезінде қиын жағдайға тап болған қарапайым адамдарға көмектесу - сауапты іс. Бірде пәтер өртеніп жатыр деген қоңырау түсті. Біз келгенде үйдің кіреберісі көк түтін болып, ас үй өртеніп жатыр екен. Қасымдағы әріптесім екеуіміз бірден ішке кіріп, анасы мен кішкентай қызын сыртқа алып шықтық. 

Өрт сөндіру оңай мамандық емес. Ол үшін құтқарушының психикасы мен  физикалық дайындығы мықты болуы керек. Себебі құтқарушы киімінің салмағы  40 келіге жуықтайды.

Тараздың орталық алаңында өрт және құтқару техникаларының көрмесі өтті. Онда өрт сөндіру, төтенше жағдайлардың салдарын жою, іздестіру-құтқару және авариялық-құтқару жұмыстарында қолданатын заманауи техника мен жабдықтар көпшілік назарына ұсынылды. Соңғы 3 жылда облыстық департаменттің автопаркі 90 пайызға жаңартылды. Онда 185 техника бар.

Ертай Райымбеков, облыстық ТЖД өрт сөндіру және авариялық құтқару басқармасы бастығының орынбасары:

- Соңғы үлгідегі техника бар, заманауи құрылғылар бар. Дрондарды қолданамыз. Видео конференция арқылы Астана болсын, басқа қалаларға байланыс арқылы шығуға жаңа техника келді бізге. Бізде әлемнен қалып жатқан жоқпыз. әлем қандай деңгейде болса, бізде сондай деңгейде жабдықталып жатырмыз.

Мерекелік шарада облыстық департаменттің 14 қызметкері Төтенше жағдайлар министрлігінің 30 жылдық мерейтойлық медальімен және алғыс хаттармен марапатталды. Олардың қатарында департаменттің жедел кезекшісі Нұрболат Әлімқұлов та бар.

Нұрболат Әлімқұлов, облыстық ТЖД жедел кезекшісі:

- Облыс, аудан көлемінде ауыл құтқаруышлары, өрт бекеттері ашылып жатыр. Ол алыс-шалғай орналасқан өрт сөндіру бөлімдеріне үлкен көһмек бізге. Әріптестерімді шын жүректен құттықтаймын, 30 жылдықтың арқасында министрліктен медаль алып, марапатталып жатырмыз. Еңбегіміз бағаланып жатыр.

Төтенше жағдайлар министрлігінің 30 жылдығына орай Таразда «құтқарушылар аялдамасы» ашылды. Жаңа аялдама қауіпсіздік туралы бейнероликтер мен маңызды қоғамдық хабарландыруларды көрсететін LED экранмен жабдықталған. Аялдама жобасын қалалық төтенше жағдайлар басқармасының мамандары жергілікті биліктің қолдауымен жүзеге асырды.

Жандос Жұмабек, Анастасия Сулейманова, Бакытжан Бапаев, Эльдар Байдилда