Tarlan Astana жолаушыларына арналған жаңа тарифтер жарияланды

АСТАНА, 30 шілде – Sputnik. Алдағы сенбіде Tarlan Astana жеңіл рельсті көлік желісінде тарифтер жүйесі енгізіледі, деп хабарлайды Sputnik Қазақстан.

1 тамыздан бастап жолаушылар өз ыңғайына қарай қажетті тарифті таңдай алады. Бір реттік жол жүру ақысы 200 теңге болып қалады. Ал Tarlan Astana-мен жиі жүретіндерге арзан тарифпен қатынауға мүмкіндік жасалады.

Мерзімдік тарифтер:

1 күн - 500 тг;

3 күн - 1 500 тг;

5 күн - 2 500 тг;

10 күн - 4 000 тг;

15 күн - 5 000 тг;

1 ай - 7 500 тг;

3 ай - 20 000 тг.

Белгіленген сапарлар саны бар тарифтер:

5 сапар - 900 тг;

10 сапар - 1 800 тг;

20 сапар - 3 500 тг;

30 сапар - 5 000 тг.

"Ағымдағы айдың 15-не дейін (қоса алғанда) сатып алынған жағдайда тариф ағымдағы айдың соңына дейін жарамды. Ал 15-нен кейін сатып алынған жағдайда тарифтің қолданылуы келесі айдың 1-нен басталады", - дейді басқарушы компания мамандары.

Барлық тариф Tarlan Astana стансаларындағы кассаларда сатылады және көлік карталарына жүктеледі.

Ал картасының теңгерімін кассада немесе терминалда тексеруге болады.

Осы орайда маңызды бір мәселені ескерген жөн: көлік картасы жоғалған жағдайда ішіндегі тарифтер қалпына келтірілмейді және басқа көлік картасына ауыстырылмайды.

Әзірше тарифтер тек Tarlan Astana жеңіл рельсті көлік желісінде қолданылады. Қазіргі кезде оны автобус желісімен интеграциялау жұмыстары жүргізіліп жатыр.