“Техпаспорт жоғалды“: 2026 жылы Қазақстанда КҚТК ны қалпына келтіру қанша тұрады

Көлікті тіркеу туралы куәлік (техпаспорт) - әрбір көлік иесінде болуға тиіс негізгі құжаттардың бірі. Онсыз жолда құжаттарды тексеру кезінде қиындық туындауы мүмкін. Техпаспорт жоғалса немесе жарамсыз болып қалса, не істеу керек?

Құжатты бірнеше жолмен қалпына келтіруге болады. Ол үшін міндетті түрде арнаулы ХҚКО-ға барудың қажеті жоқ. Tengri Auto "Азаматтарға арналған үкімет" мемлекеттік корпорациясының мәліметіне сүйеніп, жаңа техпаспортты қалай алуға болатынын, қандай құжаттар қажет екенін және 2026 жылы бұл қызмет қанша тұратынын түсіндіреді.

Техпаспортты қалпына келтіру үшін қайда жүгіну керек?

Техпаспортты жоғалтқан жағдайда оны үш жолмен қалпына келтіруге болады. Мамандандырылған ХҚКО-ға баруға немесе екінші деңгейлі банктің мобильді қосымшасы не eGov электрон үкімет порталы арқылы онлайн өтініш беруге болады.

Бұл ретте көлікті тексеруге апарудың қажеті жоқ.

Қандай құжаттар қажет және мемлекеттік баж мөлшері қандай?

Көлік иесіне тек жеке куәлігі қажет. Арнаулы ХҚКО-да құжат жоғалғаны туралы өтініш толтырып, мемлекеттік баж төлеу керек. 2026 жылы мемлекеттік баждың құны - 1,25 АЕК немесе 5406,25 теңге.

Кассада кезек күтпеу үшін өтініш берген кезде көлікті тіркеу туралы куәлікті алуға арналған мемлекеттік бажды QR код арқылы төлеуге болады.

Жаңа техпаспортты алуға көлік иесінің орнына басқа адам жүгінсе, оның өкілеттігін растайтын құжаты болуға тиіс.

Мемлекеттік нөмірді ауыстыру керек пе?

Өтініш рәсімделгеннен кейін көлік иесіне жаңа техпаспорт беріледі. Мемлекеттік тіркеу нөмірі жаңа үлгіде болса, оны ауыстырудың қажеті жоқ.

Бізді Google-дың негізгі дереккөздер тізіміне қосыңыз

Қосу