Теңге бағамымен не болып жатқанын Ұлттық банк түсіндірді

Ұлттық банк валюта нарығындағы жағдай мен теңге бағамының өзгеруіне қатысты пікір білдірді. Шілденің қорытындысы бойынша ұлттық валюта 1,3 пайызға нығайып, бір доллар үшін 473,81 теңге болды. Сондай-ақ, Ұлттық банк тамызда қанша валюта сатуды жоспарлап отырғанын және алдағы уақытта бағамға қандай факторлар әсер ететінін мәлімдеді, деп хабарлайды Tengrinews.kz.

Шілдеде теңге нығайды

Қазақстан қор биржасындағы сауда-саттықтың орташа тәуліктік көлемі шілдеде 369-дан 389 миллион долларға дейін өсті. Жалпы сауда-саттық көлемі 8,6 миллиард доллар болды.

Шілдеде Ұлттық қор биржа нарығында 200 миллион доллар сатты. Бұл сатылымдардың үлесі жалпы сауда көлемінің 2,3 пайызын немесе күніне шамамен 9 миллион доллар болды.

Бұл ретте шілдеде Ұлттық банктің валюталық интервенциялары жүргізілген жоқ.

Тамызда Ұлттық банктің Ұлттық қордан сататын валюта көлемі 200-ден 300 миллион долларға дейін болады.

Сонымен қатар, шілдеде теңестіру операциялары аясында шамамен 374 миллиард теңге алынған. Тамызда осы мақсаттар үшін 374 миллиард теңге баламасындағы валютаны сату жоспарланып отыр.

Анықтама: Теңестіру операциялары — бұл Ұлттық банктің экономикадағы артық теңгені алу үшін валюта сату механизмі. Бұл нарықта ақшаның шамадан тыс көбеюіне жол бермеуге және бағаға болуы мүмкін қысымды төмендетуге көмектеседі.

Ұлттық банк Ұлттық қор қаражатымен операциялар жүргізу және теңестіру механизмін іске асыру кезінде нарықтық бейтараптық қағидаты сақталатынын атап өтті.

Қысқа мерзімді перспективада теңге динамикасы нарық қатысушыларының күтулеріне, тоқсандық салық төлемдеріне, әлемдік нарықтардағы жағдайға және геосаяси ахуалдың өзгеруіне байланысты болады.

"Ұлттық Банк қаржылық теңгерімсіздікке жол бермейтін және алтын-валюта резервтерінің сақталуын қамтамасыз ететін икемді бағам белгілеу режимін ұстануды жалғастырады", - делінген хабарламада.

Тағы оқыңыз: Қазақстанда қандай депозиттер ең тиімді?

Google News арқылы жаңалықтарымызды қадағалаңыз