Tesla ның Қытайдағы бизнесі сатылуы мүмкін деген ақпарат рас па?

Reuters таратқан ақпаратқа сүйенген Aikyn.kz Қытайдағы Tesla-ның болашағына қатысты талдауын ұсынады.

Илон Маск Tesla-ның Қытайдағы бөлімшесі сатылуы, бөлек құрылымға айналуы немесе жабылуы мүмкін деген ақпаратты «жалған жаңалық» деп атады. Бұл мәлімдеме The Wall Street Journal басылымы Tesla басшылығы Қытайдағы бизнестің болашағына қатысты бірнеше нұсқаны талқылағанын хабарлағаннан кейін жасалды.

Басылым деректеріне сәйкес, компания кеңесшілері Қытайдағы өндірісті жеке кәсіпорын ретінде бөліп шығару, оны сату немесе қызметін толық тоқтату жолдарын зерттеген. Сонымен қатар Шанхайдағы зауыттан шығарылатын көліктерді экспорттаумен айналысатын бөлек сауда компаниясын құруды да қарастырған. Алайда әлемнің ең бай адамы Илон Маск (690 млрд байлығы бар) бұл ақпаратты үзілді-кесілді жоққа шығарды.

«Бұндай мәселе ешқашан талқыланған емес. Бұл – мүлде қисынсыз жалған жаңалық», – деп жазды ол X әлеуметтік желісінде.

Tesla-ның Қытайдағы бизнесі компания үшін стратегиялық маңызға ие. Шанхайдағы Gigafactory зауыты – Tesla-ның әлемдегі ең ірі әрі ең өнімді өндірістік нысаны. Оның жылдық қуаты 950 мыңнан астам автокөлік шығаруға қауқарлы. Тарихи тұрғыдан алғанда, бұл зауыт Tesla-ның жаһандық жеткізілімдерінің жартысынан астамын қамтамасыз етіп келген.

Шанхай кәсіпорны Еуропа, Канада және Азия-Тынық мұхиты аймағына арналған маңызды экспорт орталығы саналады. Сонымен қатар Қытайдың өзі АҚШ-тан кейінгі Tesla-ның екінші ірі нарығы болып отыр. Дегенмен компания бұл елде BYD сияқты жергілікті өндірушілердің қатаң бәсекесіне тап болды.

Tesla-ның Қытайдағы қызметі SpaceX-пен ықтимал бірігу мәселесіне байланысты ерекше назарға ілікті. SpaceX АҚШ-тың қорғаныс және ұлттық қауіпсіздік бағдарламаларына қатысатын ірі мердігер болғандықтан, екі компанияның бірігуі Қытай тарапынан геосаяси және реттеушілік қарсылық туғызуы ықтимал.JPMorgan сарапшылары бұндай мәміленің басты кедергісі Қытайдағы ұлттық қауіпсіздік талаптары болатынын айтуда. Сондықтан Tesla-ның АҚШ және Қытай бизнесін техникалық әрі басқарушылық жағынан бір-бірінен ажырату жоспары болуы мүмкін деген болжам айтылған.

Қытайдағы бөлімше Tesla үшін өндірістік шығындарды төмендетуде де шешуші рөл атқарады. Компания жергілікті 400-ден астам жеткізушімен жұмыс істейді, ал Қытайда шығарылатын Model 3 және жаңартылған Model Y көліктеріне қажет бөлшектердің 95%-дан астамы осы елден алынады.

Маусым айында Қытайда өндірілген Model 3 және Model Y жеткізілімдері бір жыл ішінде 24,4%-ға өсті. Ал Шанхай зауытының екінші тоқсандағы сатылымы мен экспорты 32,8%-ға артты. Сондықтан Tesla-ның Қытайдағы бизнесінен бас тартуы компания үшін жай ғана құрылымдық өзгеріс емес, жаһандық өндіріс тізбегін түбегейлі қайта құруды талап ететін күрделі шешім болар еді.