ТМД жастары жобасының финалы басталды

Астанада ТМД елдерінің жастары арасында «100 идея» халықаралық байқауы басталды. Бұл шараға Армения, Беларусь, Қырғызстан, Ресей, Тәжікстан және Өзбекстаннан келген білімді әрі өнерлі жастар қатысып, инновациялық жобаларын таныстыруда.

Байқау 11 жыл бойы Қауымдастыққа мүше елдер жастарының инновациялық белсенділігін арттыруды мақсат етеді. Сонымен қатар бұл жоба шығармашыл жастарды жақындастырып, жаңа идеялардың ортақ алаңына айналып отыр. Жалпы байқауға көршілес мемлекеттерден 100-ге жуық жоба түсті. Оның ішінде білім, медицина, ЖИ, өнеркәсіп салаларына бағытталған тың идеялар бар. Халықаралық жобаға қазақстандық жастар да өз үлестерін қосып жатыр. Атап айтсақ, Назарбаев мектебінің оқушысы балаларға ойын арқылы білім беретін арнайы қосымша дайындап әкелген. Байқаудың жеңімпаздары ертең белгілі болады.

Асанали Шобанов, Назарбаев мектебінің оқушысы:

- Менің жобам «Аспан» деп аталады. Басты мақсаты ол - балаларға ойын арқылы білім беру. Қосымшаның ішінде қысқаша сабақтар бар. Әртүрлі бағыт, экономика, космос, физика, математика.

Қайрат Қамбаров, ҚР МАМ Жастар және отбасы істері комитетінің төрағасы:

- Бұл өз мемлекеттерінде жақсы жетістікке жеткен, қандайда да бір орын алған, мықты жобаларды алып келген азаматтар. Солар конкурсқа қатысады. Жалпы 8 мемлекеттен қонақтар келіп отыр. Сол кісілермен кездесе отырып, жаңа жобаларды көреміз, пікір, тәжірибе алмасамыз. Жақсы жобалар болатын болса, өз мемлекетімізде соны қолданамыз.