Трамп ABC тележүргізушісін бірінші ханым туралы әзілі үшін жұмыстан шығаруды талап етті

Өткен аптада Джимми Киммел пародиялық қойылым көрсетіп, Мелания Трампқа: «Біздің бірінші ханым осында. Трамп ханым… сіз болашақ жесір сияқты жарқырап тұрсыз», — деді.

— Айтпақшы, егер бүгін кешке президентімізге шұғыл медициналық көмек қажет болса, үйде дәрігер бар ма… кешіріңіз. Айтайын дегенім, үйде Иса бар ма? Мен оларды әрқашан шатастырамын, — деп мәлімдеді ол, президент Трамп бұрын TruthSocial-да жариялап, содан кейін оны өшіріп тастаған өзінің Иса пайғамбар бейнесіндегі мемге сілтеме жасап.

Бұл әзіл Трамп қатысқан Ақ үй тілшілер қауымдастығының кешкі асындағы атыстан бірнеше күн бұрын айтылды. Ол АҚШ президентіне қастандық жасау әрекеті ретінде жіктелді. АҚШ президенті Ақ үй тілшілер қауымдастығының қабылдауынан эвакуацияланды. 

Дональд Трамп жүргізушінің сөздерін «зорлық-зомбылыққа жиіркенішті үндеу» деп атады.

— Теледидардағы рейтингіне қарағанда, мүлдем күлкілі емес Джимми Киммел өз шоуында шынымен де таңқаларлық мәлімдеме жасады. Ол бірінші ханым Мелания мен біздің ұлымыз Бэрронның жалған бейнежазбасын көрсетті, олар шын мәнінде оның студиясында отырып, оның сөзін тыңдап отырғандай болды, бірақ бұл олай болған жоқ және ешқашан болмайды. Бір күннен кейін бір ессіз адам мылтық, тапанша және көптеген пышақпен қаруланып, Ақ үй тілшілерінің кешкі ас залына кіруге әрекеттенді, — деп жазды АҚШ президенті Truth Social-да.

Америкалық көшбасшы Disney мен ABC телеарналарынан Джимми Киммелді «дереу» жұмыстан шығаруды талап етті. 

Бұған дейін АҚШ-тың бірінші ханымы Мелания Трамп та ABC-ден оқиғаға жауап беруді және жүргізушіге қарсы шара қолдануды талап еткен болатын. 

— Киммел сияқты адамдар біздің үйлерімізге әр түні кіріп, жеккөрушілік тарата алмауы керек. Қорқақ Киммел ABC-дің артына тығылып тұр, себебі телеарна оны жасыра беретінін біледі. Жетер. ABC өз ұстаным білдіретін уақыт келді. ABC басшылығы қоғамымыздың есебінен Киммелдің жиіркенішті мінез-құлқын тағы қанша рет кешіреді? , — деп мәлімдеді ол.

Бірінші ханымның әлеуметтік желідегі жазбасы бұрын консервативті белсенді Чарли Кирктің өлімінен кейін айтқан пікірлері үшін Трамп әкімшілігінің нысанасына айналған Киммелмен байланысты сөз бостандығына қатысты тағы бір үлкен дау тудырды. 

Еске сала кетсек, америкалық ABC телекомпаниясы жүргізуші Джимми Киммелдің кешкі бағдарламасын эфирден алып тастады. Оған Трамптың жақтастары жастар консервативті қозғалысының қайраткері және Дональд Трамптың серіктесі Чарли Киркті өлтіру тақырыбын пайдаланып жатыр деген сөзі себеп болған. 

Еске сала кетсек, бұған дейін консервативтік көзқарастарымен танымал америкалық блогер 

Чарли Киркке Юта алқабы университетінде сөйлеп тұрған сәтінде оқ атылды. 

Еске салсақ, Дональд Трамп 2025 жылдың желтоқсанында ВВС-ге қарсы 5 млрд доллар талап етіп, сотқа жүгінді.