Трамп АҚШ тың Иранға қарсы қуатты әскери операцияға дайын екенін мәлімдеді

АҚШ президенті Дональд Трамп басқа елдердің араағайындығымен Иранмен жүргізіліп жатқан келіссөздер сәтсіз аяқталған жағдайда, олардың "қуатты әскери операцияға дайын" екенін мәлімдеді, деп хабарлайды Tengrinews.kz РИА Новости басылымына сілтеме жасап.

Оның айтуынша, "келіссөздерге тағы бір мүмкіндік беру үшін АҚШ Иранға жасалатын шабуылдарды тоқтата тұру туралы шешім қабылдаған".

Араағайын елдердің "келіссөздерге тағы бір мүмкіндік бергісі келгенін" және дәл сол себепті 24 шілдеде Иранға шабуыл жасауды тоқтату туралы бұйрық бергенін алға тартқан Трамп: "Иранға қатысы барлардың бәрі маған: "Оқ атпаңыз" деді", - деп мәлімдеді.

Араағайын елдердің қатысуымен Иранмен жүргізіліп жатқан келіссөздерге тоқталған президент: "Біз Иранмен өте маңызды келіссөздер жүргізіп жатырмыз. Егер бұдан нәтиже шықпаса, біз өте қуатты әскери іс-қимылдарға қайта ораламыз", - деп атап өтті.

Дипломатияға қанша уақыт беретіні туралы сұраққа Трамп: "Көп емес. Не іс тез алға басады, не мүлдем нәтиже болмайды", - деп жауап берді.

24 шілдеде Оман делегациясы Ормуз бұғазындағы кеме қатынасын реттеу тетігін талқылау үшін Иран астанасына барды. Тегеран Иран мен Оман арасындағы Ормуз бұғазындағы кеме қатынасын реттеу тетігіне қатысты келіссөздер барысында "ілгерілеушілікке қол жеткізілгенін", алайда әзірге келісім жасалмағанын хабарлады.

Бұған дейін New York Times газеті Трамптың Иранға қарсы әскери науқанды күрт күшейту жоспарын кейінге қалдырғанын хабарлаған болатын. Бұған қақтығыстың ушығуы Таяу Шығыстағы Patriot ұстағыш зымырандары мен әуе шабуылына қарсы қорғаныс құралдарының онсыз да азайған қорын қауіпті деңгейге дейін сарқып алуы мүмкін деген қауіп себеп болған.

Google News арқылы жаңалықтарымызды қадағалаңыз