Трамп Иранға 10 15 күн уақыт берді

АҚШ президенті Дональд Трамп Иранның 10-15 күн ішінде «маңызды» ядролық келісімге қол жеткізуі қажет екенін, әйтпесе «салдары өте жаман» болатынын мәлімдеді. Ол бұл туралы бейсенбі күні Вашингтонда өзі құрған Бейбітшілік кеңесінің отырысында сөйлеген сөзінде хабарлап, содан кейін бұл сөздерін Air Force One бортында тілшілерге растады.

— Әйтпесе, жаман нәрселер болады, — деп атап өтті Трамп, Тегеран келісімге келуге дайын екенін көрсетуі керек «ең көбі — шамамен 10-15 күн» екенін қосты. 

АҚШ осы мәлімдемелер аясында аймақта кең ауқымды әскери күш жинауды жалғастырып отыр: Таяу Шығыс жағалауларына әуетасымалдағыштар, әскери кемелер және жойғыш ұшақтар жіберілді. АҚШ-тың бір шенеунігі Reuters агенттігіне күштерді орналастыру наурыздың ортасына дейін аяқталуы керек екенін хабарлады. Трамп Иранның ядролық инфрақұрылымына жасалған бұрынғы шабуылдарды еске салып, Тегеранның мүмкіндіктері «айтарлықтай әлсірегенін» мәлімдеді, бірақ одан әрі қадамдарды жоққа шығарған жоқ. 

Осы арада The Wall Street Journal басылымы әкімшіліктің талқылауларымен таныс дереккөздерге сілтеме жасай отырып Трамптың Иранның бірнеше әскери немесе үкіметтік нысандарына алдын ала, шектеулі соққылар жасауды қарастырып жатқанын хабарлады.

Басылымның мәліметінше, мұндай әрекеттер президенттің соңғы мақұлдауына байланысты бірнеше күн ішінде жасалуы мүмкін. 

Жазбаға сәйкес, шиеленістің біртіндеп ушығу сценарийі шамаланып отыр: егер Иран уранды байытуды жалғастыра берсе, АҚШ әскери операцияны кеңейтіп, соның ішінде ел басшылығымен байланысты нысандарға соққылар жасай алады.

Газет дереккөздерінің бірі Трамптың «шектеулі әрекеттерден» бастауы, Иран тарапы ядролық бағдарламасын тоқтатуға келіспейінше немесе одан да ауыр зардаптарға тап болмайынша қысымды күшейтуі мүмкін екенін атап өтті. Шиеленістің артуы әлемдік нарықтарға әсер етті, мұнай бағасы одан әрі ушығу қаупіне байланысты көтерілді.

АҚШ пен Иран шенеуніктері арасындағы келіссөз Оманның делдалдығымен жалғасып отыр. Трамптың айтуынша, «жақсы келіссөз жүріп жатыр», алайда екі тарап бірқатар маңызды мәселелер бойынша, соның ішінде байыту бағдарламасының болашағы және Вашингтонның Тегеранның зымыран бағдарламасы мен аймақтық белсенділігіне қатысты қосымша талаптары бойынша әлі де келіспей отыр.

Осыған дейін Трамп Иранға шабуылды сенбі күні мақұлдауы мүмкін екенін жаздық. 

Кейін ол Иранмен келісімнің жағдайы 10 күн ішінде анықталатынын мәлімдеді.