Трамп Иранға шабуыл жасауға бұйрық берді

Парсы шығанағы аймағындағы жағдай күрт ушығып кетті. АҚШ әскери күштері Иран аумағындағы нысандарға жаңа соққылар сериясын бағыттады. АҚШ Орталық қолбасшылығының (CENTCOM) хабарлауынша, шабуыл Президент Дональд Трамптың нұсқауымен жүзеге асырылған және Тегеран тарапынан болған «жалғасып жатқан агрессияға» жауап болды, деп хабарлайды Би-би-си.

Американдық әскери дереккөздердің мәліметінше, Иранның кем дегенде алты ауданында жарылыс гүрсілдеген. Әуе шабуылына қарсы қорғаныс (ӘШҚО) жүйелері, радарлар мен ұшқышсыз ұшу аппараттарын басқару пункттері нысанаға алынды. Қазіргі уақытта АҚШ-тың операциясы ресми түрде аяқталды.

АҚШ Президенті Дональд Трамп бұл жағдайға қатысты өз әлеуметтік желісінде пікір білдіріп, Иранның келіссөздерді созып жібергенін және енді «сазайын тартатынын» мәлімдеді. Вашингтонның мұндай қатаң әрекеттерге баруына бұған дейін Иран дроны атып түсірген американдық Apache тікұшағы себеп болған.

«Олар өздері үшін өте тиімді болуы мүмкін мәміле туралы келіссөздерді тым созып жіберді, енді сол үшін сазайын тартуы тиіс!!!» — деп жазды Трамп және әскери тұрғыдан Иранның талқандалғанын қоса кетті.

Иранның қарымта соққысы және кеме қатынасына төнген қауіп

Иран тарапы да көп күттірмей жауап қайтарды. Ислам революциясының күзет корпусы (ИРКК) екі толқынды әскери операция жүргізілгенін мәлімдеді. Иранның зымырандары мен ұшқышсыз ұшу аппараттарының соққысына Бахрейн, Кувейт және Иорданиядағы американдық әскери базалар ілікті. Тегеранның мәлімдеуінше, 18 маңызды әскери нысана, соның ішінде Patriot жүйелерінің радарлары жойылған.

Алайда CENTCOM бұл ақпаратты теріске шығарып, Иран зымырандарының барлығы дерлік қағып түсірілгенін, әскерилер арасында зардап шеккендер жоқ екенін айтты, ал ИРКК мәлімдемесін «жалған» деп атады.

Бұдан бөлек, Иран Ормуз бұғазының кез келген коммерциялық кемелер мен мұнай танкерлері үшін іс жүзінде жабылғанын жариялады. Шығанақ арқылы өтпек болған АҚШ Әскери-теңіз күштерінің кемелері мен сауда кемелеріне шабуыл жасалғаны хабарлануда.

Порттарды қоршауға алу және танкерге жасалған шабуыл

Жағдай халықаралық кеме қатынасына да әсер етті. АҚШ Иран порттарын толық қоршауға алды (блокада енгізді). Осы шаралар аясында американдық ұшақ жоғары дәлдікті оқ-дәрілермен Палау туы астындағы Settebello сауда кемесіне соққы берді. Вашингтонның мәлімдеуінше, бұл кеме Ираннан жасырын түрде мұнай алып шықпақ болған және тоқтау туралы бұйрықтарды елемеген. Үндістан билігі экипаждың екі мүшесі (Үндістан азаматтары) хабар-ошарсыз кеткенін мәлімдеп үлгерді. Бұл — блокада кезінде американдық әскерилер тарапынан шабуылға ұшыраған сегізінші кеме.

Иран СІМ өз кезегінде Ақ үйді бейбіт келіссөздерді үзді, талаптарды үнемі өзгертті және бітімгершілікті бұзды деп айыптады. Сондай-ақ Тегеран диалог жүргізу үшін «тұрақтылықтың ең төменгі деңгейі болса да қажет» екенін атап өтті.

Сарапшылар Парсы шығанағындағы эскалация мен Ормуз бұғазының бұғатталу қаупі әлемдік мұнай нарығын айтарлықтай тұрақсыздандыруы және жаһандық логистикалық маршруттарға әсер етуі мүмкін екенін айтуда.

Бүгін, 09:24