Тұрғындар сынаған жасанды көгал Жезқазғанда алына бастады

Жезқазғанда шамамен бір ай бұрын Сәтбаев көшесіне төселген жасанды көгалды жинап жатыр. Әкімдік өкілдері бұл жабынның уақытша төселгенін және демеушілер есебінен сатып алынғанын мәлімдеді, деп хабарлайды Tengrinews.kz тілшісі.

Тұрғындар неге наразы болды?

Жасанды көгалды демонтаждау туралы ақпарат әлеуметтік желілерде пайда болды. Жазбада жабын бюджет қаражатына төселіп, арада бір ай өткеннен кейін оны алып тастау туралы шешім қабылданғаны айтылады.

"Осыдан бір ай бұрын шенеуніктер халықтың миллиондаған теңгесіне табиғи көгалдың орнына жасанды пластик жабындыны пайдаланып, "көгалдандыру" жұмыстарын жүргізген. Енді оны жай ғана жинап алып тастап жатыр. Ақша желге ұшты", - делінген жарияланымда.

Әкімдік не деді?

Жезқазған әкімдігі Сәтбаев көшесіндегі жасанды жабынның бастапқыдан-ақ уақытша төселгенін мәлімдеді. Қазір бұл аумақта басқа да абаттандыру жұмыстары жоспарланғандықтан, көгалды алып жатыр.

"Жезқазғанның кейбір көшелеріне бұған дейін уақытша жасанды көгал жабындысы төселген болатын. Қазіргі уақытта оны демонтаждау жұмыстары жүргізіліп жатыр, өйткені көгал төселген учаскелерде абаттандыру жұмыстарын жүргізу жоспарланып отыр", - деп хабарлады әкімдік.

Сондай-ақ баспасөз қызметі қазір жиналып жатқан көгалдың бюджет есебінен емес, демеушілік қаражатқа алынғанын атап өтті.

30 миллион теңгелік сатып алудың бұған қандай қатысы бар?

Бұған дейін Жезқазғанның ТҮКШ бөлімі 30 миллион теңгеден астам сомаға синтетикалық жабын сатып алуды жоспарлап отырғаны хабарланған болатын. Алайда бұл қала көшелеріне емес, спорт алаңдарына арналған мүлдем басқа көгал туралы болып отыр.

Осылайша, әкімдік нұсқасы бойынша, Сәтбаев көшесіндегі жабын мен жоспарланған 30,176 миллион теңгелік бюджеттік сатып алудың арасында ешқандай байланыс жоқ.

"Тұрғын үй-коммуналдық шаруашылық бөлімі сатып алатын жасанды көгалға келетін болсақ, мекеме оны бюджет қаражаты есебінен 30,176 миллион теңге сомасына сатып алуды жоспарлап отыр. Бұл көгал 2023 жылы жөндеуден өткен футбол, волейбол және баскетбол алаңдарының жабынын ауыстыруға арналған", - деп атап өтті әкімдік.

Көгал бұған дейін де сауалдар тудырған

Төселгеннен кейін шамамен бір апта өткен соң тұрғындар қатты желден кейін жабынның кейбір тұстары көтеріліп, түріліп қалғанын байқаған. Бұл жағдайды жергілікті белсенді Берік Жағыпаров сынға алды.

Instagram-дағы бұл жарияланымды көру

Check-point.kz (@check_point.kz) жариялаған жазба

Сол кезде әкімдік жабынның бүлінбегенін мәлімдеген еді. Шенеуніктердің айтуынша, видео түсірілген сәтте көгал алдын ала төселген және әлі оны толықтай тегістеп, бекітіп үлгермеген.

Google News арқылы жаңалықтарымызды қадағалаңыз

Жазылу