Туристер арасында танымал қала жаңа салық енгізіп, саяхатшыларды үркітіп алды

Шотландия астанасы Эдинбургте туристік салық күшіне енді, алайда жаңа шара енгізілген алғашқы сағаттарда-ақ мәдениет саласына тигізген салдары үшін сынға ұшырады. Туристік индустрия мен ұйым өкілдері қосымша алым келушілердің бір бөлігін үркітуі мүмкін екенін, ал кейбір іс-шараларды қайта қарауға тура келгенін ескертті, деп хабарлайды Tengri Travel.

Daily Express ақпаратынша, енді қонақүйлерде немесе өзі орналасатын нысандарда түнейтін туристер брондау құнының 5 пайызы мөлшерінде қосымша алым төлеуі тиіс. Салық қалаға жылына шамамен 50 миллион фунт стерлинг табыс әкеледі деп күтіледі.

Эдинбург - мұндай туристік алымды енгізген Шотландиядағы алғашқы қала. Осыған ұқсас салықтар Амстердам, Париж және Римді қоса алғанда, бірқатар Еуропа астаналарында қолданылады.

Жаңа шара тамыз айында басталатын фестивальдер маусымы қарсаңында іске қосылды. Қала билігінің бағалауынша, бұл кезеңде Эдинбург 3,5 миллионға дейін келушіні қабылдауы мүмкін.

Жаңа алымның әсері туралы алғашқылардың бірі болып Scottish Ballet хабарлады. Балет труппасы шығындардың өсуіне байланысты Эдинбургтегі гастрольдік бағдарламасын қысқарту туралы шешім қабылдады.

Бастапқыда спектакльдер 11-31 желтоқсан аралығына жоспарланған болатын, алайда енді қойылымдар 24 желтоқсанда аяқталады.

Театр әртістер мен қызметкерлерді орналастыруға жұмсалатын қосымша шығындар қойылымдардың толық сериясын өткізуді мүмкін емес еткенін мәлімдеді.

"Эдинбургтегі гастрольдік экономика тез арада тұрақсыз күйге түсіп барады. Біз осы қалаға сенетіндіктен, мұнда жұмыс істеу жолдарын іздестіруді жалғастырамыз", - деді Scottish Ballet атқарушы директоры Стивен Рот.

Ол келу құнының артуы тек мәдени ұйымдарға ғана емес, қаланың туристік тартымдылығына да кері әсерін тигізуі мүмкін екенін ескертті.

"Егер туристік экономика қаланың атмосферасын жасайтын әртістер үшін де, қойылымдарды тамашалауға келетін көрермендер үшін де тым қымбат болса, онда Эдинбургтің келуге тұрарлық қасиетіне нұқсан келтіру қаупі туындайды", - деп толықтырды ол.

Scottish Ballet пен Шотландияның Ұлттық театры туристік салықтың қолданылу механизмін қайта қарау туралы үндеу тастады.

Атап айтқанда, Scottish Ballet Шотландияның ұлттық орындаушылар ұжымдарына алымнан босату немесе арнайы жеңілдіктер беруді ұсынады. Бұл тек балетке ғана емес, сонымен қатар Шотландияның Ұлттық театрына, Шотландия операсына, Шотландия Корольдік ұлттық оркестріне және Шотландия камералық оркестріне де қатысты.

Ұйым өкілдерінің пікірінше, қосымша шығындар қалада гастрольдер мен мәдени іс-шараларды өткізуді қиындатуы мүмкін.

Сынға қарамастан, қалалық кеңес басшылығы туристік салық Эдинбургке айтарлықтай пайда әкеледі деп есептейді.

Муниципалитет бағалауынша, 2028/29 қаржы жылына қарай бұл алым жыл сайын 45-тен 50 миллион фунт стерлингке дейін табыс әкелуге мүмкіндік береді.

Қалалық кеңестің басшысы Джейн Мигер Эдинбургті күтіп-ұстау үлкен шығындарды талап ететінін, сондықтан бұл шығындардың бір бөлігін тек тұрғындар ғана емес, қала қонақтары да көтеруі әділетті екенін атап өтті.

"Қаланы жоғары деңгейде ұстап тұру айтарлықтай қымбатқа түседі және бұл үшін тек тұрғындар төлеуі тиіс деген пікірмен келіспейміз. Сондықтан келушілердің де өз үлестерін қосқаны дұрыс", - деді ол.

Қала билігінің жоспарына сәйкес, шамамен 5 миллион фунт стерлинг 472 жаңа үй салуға және қалалық инфрақұрылымды жақсарту жобаларына жұмсалады. Тағы 1 миллион фунт стерлинг қала орталығында бұқаралық іс-шаралар кезінде қауіпсіздікті қамтамасыз ететін жаңа полиция бөлімшесін құруға бағытталады.

Сонымен қатар 5 миллион фунт стерлинг Leith Theatre театрын қалпына келтіруге, ал тағы 3 миллион фунт стерлинг Old Royal High School ғимаратын ұлттық музыкалық орталыққа айналдыру жобасын жалғастыруға бөлінеді.

Туристік салық қалалық жобаларды қаржыландырудың жаңа көзі болады деп күтіліп отырғанда, мәдениет саласының өкілдері іс-шара ұйымдастырушылары мен туристер үшін шығындардың артуы келушілер санына және болашақ гастрольдерге әсер етуі мүмкін екенін ескертеді. Қаланың мәдени бағдарламасындағы алғашқы өзгерістер жаңа алым күшіне енген күні-ақ байқалды.

Бұл туристік алым ережелерін қайта қарап жатқан жалғыз қала емес.

Мәселен, Венеция билігі бір күндік туристер үшін кіру жарнасын көтеруді жоспарлап отыр. Жаңадан сайланған мэр Симоне Вентурини жекелеген күндері ең жоғары төлемді 50 еуроға дейін жеткізуге ниетті. Бұған жүйенің алғашқы жұмыс жылдарының нәтижесі себеп болды: қала билігінің пайымдауынша, алдын ала брондау кезіндегі 5 еуролық және соңғы сәтте төленетін 10 еуролық қазіргі тарифтер туристер ағынын тежеуге іс жүзінде әсер етпеген.

Сонымен қатар қонақүй бизнесінің өкілдері бұл бастаманы қолдап, жоғары әрі икемді ставка келушілердің ең көп шоғырланған күндері олардың санын тиімдірек реттеуге көмектеседі деп санайды. Түскен қаражатты, соның ішінде, Венеция тұрғындарының қажеттіліктеріне жұмсау жоспарланған.

Тағы бір мысал - Барселона. 2026 жылдың 1 сәуірінен бастап қала туристік салықты екі есе арттырады. Ең жоғары ставка бір түнге 6,25-тен 12,5 еуроға дейін өседі, ал қонақүй қонақтары үшін міндетті алымдардың жалпы сомасы орналасу санатына байланысты шамамен 10-нан 15 еуроға дейінгі аралықты құрайды.

Бұл шешім қолжетімді тұрғын үй құрылысын қаржыландыру және туристер ағынын ішінара шектеу қажеттілігімен түсіндіріледі. Жаңа ережелерге сәйкес, қосымша табыстың төрттен бірі тұрғын үй дағдарысын шешуге, ал қалған қаражат Туризмді дамыту қорына бағытталады.

Тағы оқыңыз: Еуропаның тағы бір елі туристер үшін алымдарды арттырып жатыр

Google News арқылы жаңалықтарымызды қадағалаңыз