Туристің автокөлігі Қазақстанға кіргеннен кейін бұғатталып қалды

Қытайдан шыққан Zeekr 9X кроссоверінің иесі Қазақстан шекарасынан өткеннен кейін көлігінің жұмысында қиындық туындағанын айтты, деп хабарлайды Tengri Auto CarNewsChina-ға сілтеме жасап.

Басылым мәліметінше, Лю есімді көлік иесі Қазақстанға кірген соң көліктің кейбір зияткерлік функциялары 30 сағаттан астам уақыт бойы істемей қалғанын жеткізген.

Оның айтуынша, навигация, жүксалғышты басқару және жанармай багының электронды қақпағы қолжетімсіз болып қалған, бұл оның Еуропаға бағытталған сапарын қиындатқан.

Сапар 8 шілдеде басталған, ал 16 шілдеде Қазақстан шекарасынан өткеннен кейін көлік жүйесі қорғаныс режимін іске қосқан.

Көлік иесінің айтуынша, ол сапарға шығар алдында ресми дилерге жоспарланған бағыты туралы хабарлаған, бірақ оған Қытай аумағынан шыққанда мұндай шектеу болуы мүмкін екені ескертілмеген.

Zeekr өкілдері мұның себебі көлік ел аумағынан тыс жерде ұзақ уақыт болған жағдайда автоматты түрде қосылатын кіріктірілген қауіпсіздік механизмі екенін түсіндірді.

Компания бұл жүйе автокөліктерді ұрлаудан, заңсыз әкетуден және халықаралық тасымалға қатысты басқа да тәуекелден қорғау үшін қолданылатынын атап өтті.

Бұл ретте өндіруші шектеу көліктің негізгі жүйелеріне әсер етпейтінін баса айтты. Басқару жүйесі, тежегіш пен қозғалтқыш штаттық режимде жұмыс істей береді, сондықтан көліктің толық бұғатталғаны туралы айту орынсыз.

Сондай-ақ Zeekr қуаттау қосқышын қолмен ашуға болатынын, ал жанармай багының қақпағы апаттық сигнал түймесін бес секунд басып тұру арқылы ашылатынын түсіндірді.

Сапар заңдылығы расталғаннан кейін компания арнайы авторлану коды арқылы шектеуді алып тастай алады. Дегенмен, мұндай бұғаттан босату тек бір аймақ шегінде жарамды. Егер көлік бірнеше ел арқылы өтсе, жүйе қайта іске қосылуы мүмкін.

Компания көлік иесі мәселесін шешкенін мәлімдеп, халықаралық сапарды ыңғайлы ету үшін қолданушылар пікірін ескере отырып, қауіпсіздік механизмін жетілдіруге уәде берді.

Google News арқылы жаңалықтарымызды қадағалаңыз