Түркістан облысында 530 мың гектардан астам қоғамдық жайылым тапшы

Түркістан облысының жалпы жер қоры — 11 млн 610,3 мың гектар. Оның 4 млн 527,3 мың гектары — ауыл шаруашылығы мақсатындағы жер.

Облыстық жер қатынастары басқармасының басшысы Ерғали Тілегеннің айтуынша, өңірде ауыл шаруашылығы мақсатындағы жерлерді мемлекет меншігіне қайтару екі бағытта жүргізіліп жатыр.

— Алдымен министрлік тарапынан бекітілген жоспар бойынша өткен жылы 129,9 мың гектар жер телімі мемлекет меншігіне қайтарылды. Екінші бағыт бойынша өңірде ауыл шаруашылығы кешенін зерделеу мақсатында арнайы жұмысшы топ құрылды. Жүргізілген талдау нәтижесінде аудан, қала әкімдіктері бойынша 3 960 жер пайдаланушының 372,6 мың гектар жайылым жерінде мал басы тіркелмегені анықталды. Соның нәтижесінде 225,2 мың гектар жер мемлекет меншігіне қайтарылды. Биыл 187,3 мың гектар жайылым жерді мемлекет меншігіне қайтару бағытында тиісті жұмыстар жүргізіліп жатыр, — деді Ерғали Аманкелдіұлы.

Спикердің сөзінше, аудан және қала әкімдіктері бойынша 1 542 жер пайдаланушының 302,4 мың гектар жерді мақсатына сай пайдаланбағаны анықталған. Осыған байланысты оларға тиісті хабарламалар жолданған.

Сонымен қатар елдімекендерді қоғамдық жайылыммен қамтамасыз ету мақсатында 2021-2025 жылдар аралығында облыста 1 млн 176 мың гектар жайылым жер мемлекет меншігіне қайтарылды. Оның ішінде 950,3 мың гектар жайылым ауылдық округ әкімдіктеріне қоғамдық жайылым ретінде пайдалануға берілген.

Ведомство мәліметінше, қазіргі таңда облыста елдімекендердегі қоғамдық жайылым тапшылығы 531,1 мың гектарға жетіп отыр.

Жайылым тапшылығы байқалатын Жетісай және Мақтаарал аудандарын қоғамдық жайылыммен қамтамасыз ету мақсатында Шардара орман қоры аумағынан 100 мың гектар жер ұсынылған.

Бұдан бұрын Түркістан облысында ауыл әкімдерінің жер бойынша шешімдерінен заң бұзу анықталғанын жазған едік.