Испаниядағы орман өрті 77 мың гектардан астам аумақты шарпыды

Испанияның үшінші вице-премьері әрі Экологиялық көшу министрі Сара Аагесеннің айтуынша, Мадрид автономиялық қауымдастығында, сондай-ақ Авила мен Толедо провинцияларындағы орман өрттері жалпы 77 мың гектардан астам аумаққа таралған.

Ең көп зардап шеккен осы өңірлерде 46 муниципалитеттегі шамамен 100 мың адам эвакуацияланды немесе үйлерінен шықпау жөнінде нұсқау алды. Демалыс күндері шығыстағы Кастельон провинциясында тұтанған тағы бір орман өрті 18 муниципалитеттегі 16 мыңнан астам тұрғынға әсер етті.

Испанияда орман өртіне байланысты төтенше жағдай жарияланды

Жексенбі күні мыңдаған өрт сөндіруші Төтенше жағдайлар жөніндегі әскери бөлімшенің (UME), өрт сөндіру ұшақтары мен тікұшақтарының қолдауымен тілсіз жаумен күресті жалғастырды.

UME қолбасшысы, генерал-лейтенант Франсиско Хавьер Маркос Искьердоның мәліметінше, Авила мен Мадридтегі өрт ошақтары әзірге біріккен жоқ, өйткені олар Сан-Мартин-де-Вальдейглесьяс муниципалитеті маңындағы өте шағын әрі үзік-үзік аумақта ғана түйіседі. Оның айтуынша, өрт сөндірушілер екі өрт аймағының қосылып кетуіне жол бермегенімен, өрттің бүкіл периметрі әлі толық оқшауланбаған.

Еуропада орман өрті өршіп тұр: Франция, Италия, Испаниядағы ахуал қандай?

Мадридтің батысындағы Навалькарнеро муниципалитетіндегі жедел штабтан сөйлеген Сара Аагесен орман өрттерімен байланысты жағдайды «күрделі» деп бағалап, төтенше жағдай қызметтері бір мезгілде бірнеше бағытта жұмыс істеп жатқанын айтты. Ол қажет болған жағдайда жаңа эвакуациялар жариялануы мүмкін екенін ескертіп, эвакуацияланған тұрғындарға жағдай толықтай қауіпсіз деп танылғаннан кейін ғана үйлеріне оралуға рұқсат берілетінін мәлімдеді.