Түркістан облысында басқарма басшысы төбелескені үшін жұмыстан босатылды

АСТАНА, 6 желтоқсан – Sputnik. Мемлекеттік қызмет істері агенттігі Түркістан облысының Мемлекеттік сәулет-құрылыс бақылау басқармасының басшысы жұмыстан босатылатынын хабарлады.

Желіде Шымкенттегі шенеуніктің төбелескен видеосы тараған, қоғамда резонанс тудырған еді.

Агенттіктің Түркістан облысы бойынша департаменті жуырда әлеуметтік желіде қоғамдық резонанс тудырған, мемлекеттік қызметшінің қатысуымен болған төбелес оқиғасына байланысты тиісті қызметтік тексеріс жүргізді.

"5 желтоқсан күні агенттіктің Түркістан облысы бойынша Әдеп жөніндегі кеңесі тиісті шешім қабылдады. Кеңес шешімімен Түркістан облысының Мемлекеттік сәулет-құрылыс бақылау басқармасының басшысы С.Жалықұлға қатысты қызметтік әдеп нормаларын бұзғаны үшін "атқарып отырған лауазымынан босату" түріндегі тәртіптік жаза қолдану ұсынылды", - делінген агенттік хабарламасында.

Әдеп жөніндегі кеңес Жалықұл тарапынан болған тұрпайы, қоғамға жат мінез-құлықты, сондай-ақ мемлекеттік органның беделін түсіретін әрекет жасау арқылы жалпыға ортақ моральдық-этикалық нормаларды бұзу фактісін анықтады.