Түркістан облысында Келешек мектебі халық игілігіне берілді

Түркістан облысының Төле би ауданында «Келешек мектебі» пайдалануға берілді.

300 орындық заманауи білім ошағы Қосағаш елді мекенінде салынды. Бұл ұлттық жоба аясында ауданда ашылған 3-мектеп. Бұған дейін Көксәйек елді мекенінде 600, ал Киелітаста 900 оқушыға арналған мектеп пайдалануға берілді. 

Қосағаш пен Қорған ауылының жоғары сынып оқушылары көршілес Екпінді ауылындағы мектепке қатынайтын. Ал бастауыш сыныптағы 100 бала ауылдағы шағын жинақты мектепте білім алды. Енді барлық бала   жаңадан ашылған заманауи мектепке барады.

Нұрханым Әнуарбек, оқушы:

- Енді осы бізге жасап берген жағдайға байланысты біз болашақта жақсы білім аламыз және жақсы нәтиже көрсетеміз деген үміттемін. Осы мектепті ең бірінші 11-сынып болып аяқтап, ҰБТ-дан да жақсы нәтиже көрсетеміз деп сенемін. Бізге берілген мүмкіндіктердің барлығын жақсы жағынан пайдалануға тырысамыз. 

«Келешек мектебі» 1 жылда салынды. Мұнда кең әрі жарық сыныптар, пәндік және зертхана кабинеттері, интерактивті тақталар, робототехника, IT сыныптары мен компьютер кластары   бар.

Айдос Қаныбек, мердігер:

- Сапа жағынан ешқандай мәселе болған жоқ. Бұл мектепте арнайы қаулы бойынша заманауи талапқа сәйкес, қазіргі оқушыларды білікті шәкірт ретінде тәрбиелейтін, барлық заманауи құрылғылар, аспаптар, жиһаздар арнайы түрде әзірленген.

Мектепте оқушылардың қауіпсіздігі басты назарда. Ғимарат бейнебақылау, өртке қарсы заманауи жүйелермен жабдықталған. Инклюзивті білім беру талаптарына сай пандустар мен арнайы санитарлық тораптар орнатылды.

Еркеғали Әлімқұлов, Төле би ауданының әкімі:

- Сапасы бойынша оң баға береміз. Құзіретті органдардың барлығы келіп, тексеріп алды. Дегенмен, пайдалану барысында шығартын кемшіліктер болатын болса, мердігердің 5 жылға дейін кепілі бар. Сол бойынша жұмыстарды жасатамыз. Қазір енді балалардың оқуына, жаттығуына барлық қолайлы жағдайлар жасалған. Спорт залы, асханасы, кабинеттердің барлығы жұмыс істеп тұр.

Облыста "Келешек мектептері" ұлттық жобасы аясында 29 мектеп салынды. Ең соңғы 1500 орындық білім ордасы жақында Жетісай ауданында тапсырылады. Одан бөлек биыл өңірде 14 мектептің құрылысы жүріп жатыр.

Жандос Жұмабек, Ерболат Әбіш