Түркістан облысындағы Атакентте Келешек мектебі қолданысқа берілді

Түркістан облысының Атакент кентінде 1500 орындық "Келешек мектебі" қолданысқа берілді.

Бұл ұлттық жоба аясында ауданда ашылған екінші мектеп. Аудан тұрғындары жаңа білім ұясы осы өңірдің адами капиталын жақсартып, ұстаздар мен оқушыларды жаңа белеске жетелейтінін айтады.

Бүгін Мырзашөл өңірінің халқы үшін қуанышты күн. Ауданда "Келешек мектебі" жобасы аясында заманауи білім ордасы бой көтеріп, ел игілігіне берілді. Жұртшылықты жаңа ғимараттың ашылуымен құттықтаған облыс әкімі Нұралхан Көшеров заманауи білім ордасында оқушылардың терең білім алып, шығармашылығын дамытуға барлық жағдай жасалғанын атап өтті.

Нұралхан Көшеров, облыс әкімі:

- Жалпы Мемлекет басшысының тапсырмасы аясында әрбір оқушының білім алып, жан-жақты дамуы үшін қолайлы жасау керек деп тапсырма берген болатын. Осы бағытта жалпы республика бойынша 217 мектептің құрылысы жүріп жатыр. Соның ішінде 29-ы біздің өңірге тиесілі. Ұстаздардың еңбегі өте жоғары. Сіздердің еңбектеріңізді біз толық түсініп, үлкен алғыс айтамыз.

Мектеп заманауи талаптарға сай жабдықталған. Спорт, мәдениет, мәжіліс залы, асхана, оқу бөлмелері мен арнайы пән кабинеттері бар. Жоба құны - 5,2 млрд теңге. Ал ғимарат 14 мың шаршы метр аумақта орналасқан. Ауыл тұрғындары мұнда парасатты және бәсекеге қабілетті жастар тәрбиеленіп шығатына сенеді.

Қилыбай Монанұлы, Атакент тұрғыны:

- Менің өзімнің үйде 20 шақты немерелерім бар. 10-15 шөберем бар. Осы "Келешек мектепке" қоныстанып, оқып, өсіп-өнеді деп ойлаймын.

Түркістан облысында Мемлекет басшысының тапсырмасымен «Келешек мектептері» ұлттық жобасы аясында 29 білім ұясы салынды. Бүгінге дейін соның 27-сі пайдалануға берілді. Қалған екі мектептің құрылысы жыл соңына дейін аяқталады деп күтілуде.

Жандос Жұмабек, Ерболат Әбіш