Түркістан облысындағы Хантағы ауылына газ берілді

Түркістан облысы Кентау қаласына қарасты Хантағы ауылына газ берілді. Көмір жағып, қыстан қысылып  шығатын 7 мыңнан аса тұрғын енді көгілдір отынның қызығын көреді. Жалпы өңірде соңғы үш жылда 70 ауылға табиғи газ жетті.

Көгілдір отынның қызығын көріп, тұрмысы жайлана түскендердің бірі –Исаевтар отбасы. Талай жыл тонналап көмір алып, пеш жағудың азабын көрген олар енді бұл машақаттан құтылды.

Асылзат Исаева, Хантағы ауылының тұрғыны

- Менің осы шаңыраққа келін болып түскеніме 30 болыпты. Сол жылдан бері күзден бастап от жағамыз. Үлкен қарияларымыз бар үйде, сол кісілер тоңбасын деп тұрмыс-тіршілігіміздің жеңілдеуіне қуаныштымыз.

Жұбандық Құлжанов, ауылдық ардагерлер кеңесінің төрағасы:

- Бұл газдың пайдасы көп. Үй ішінің тазалығына да, көшенің тазалығына да, керек десең ауылымыздың тазалығына да пайдасы көп. Басшыларға да, осы газды кіргізген жігіттерге де рахметімізді айтамыз.

Кентау қаласына қарасты Байылдыр ауылына газ жыл басында жеткізілді. Көгілдір отынға бүгін қосылған Хантағы ауылында 1200 абонент бар. Ал Қарнақ пен Ащысай ауылдарына газ келесі жылы кіргізіледі. Облыстағы ауылдардың 74%-ы газбен қамтылған.

Зұлпыхар Жолдасов, облыс әкімінің бірінші орынбасары:

- Біз қазір жалпы халықты 86%-ға дейін газбен қамтамасыз еттік. Ең үлкен, ірі елдімекендерді барлығын қамтыдық. Осы үш жылдың өзінде 70 ауылға газ жеткіздік.

Мамандар жыл соңына дейін тағы да 20-ға жуық елді мекен тұрғындары  көгілдір отынға қол жеткізіп, өркениеттің игілігін көретінін айтады.

Авторлары: Жандос Жұмабек, Ерболат Әбіш, Қуаныш Әбуов