Қараөткел ауылына газ тартылды

Тәуелсіздік күні қарсаңында Ақмола облысы Қараөткел ауылының тұрғындары көгілдір отынға қол жеткізді. Бүгін жергілікті әкімдіктің, «QazaqGaz» ұлттық компаниясының және «QazaqGaz Aimaq» еншілес кәсіпорнының қолдауымен ауылға алғаш рет табиғи газ қосылды.

Елорда іргесіндегі Қараөткел елді мекенінің тұрғындары үшін бүгін қуанышты күн. Арқаның аязы күшіне мінбей тұрып, мыңнан аса үйге табиғи газ тартылып, біраз тұрғынның тұрмысы жеңілдеді.

Уәлихан Қымбатов, «QazaqGaz Aimaq» АҚ Астана өндірістік филиалының директоры:

- Бүгін Қараөткел ауылын газдандыру жобасы бойынша 99 шақырым жоғары, ортаңғы және төменгі қысымды газ желілері салынды. Газ реттегіш пункт және 23 газ реттегіш «шкафтар» жүзеге асырылды. Ол 2,5 мың абонентке газды қолдануға мүмкіндік береді.

Жоспар бойынша ауылды газдандыру жұмысы 2027 жылы аяқталуы тиіс еді, алайда техникалық және жобалық өзгерістерді дер кезінде енгізудің арқасында көгілдір отын небәрі 8 айдың ішінде тұрғындар игіліне берілді.

Рахия Оспанова, Қараөткел ауылының тұрғыны:

- Елді мекенде тұрып жатқанымызға 7-8 жыл болды. Содан бермен қарай көмір тасып, күл шығарудан әлек едік. Кешеден бері тарихи сәт болып жатыр. Қандай рақат! Үйіміз деген жып-жылы.

100 шақырымға созылған түрлі қысымдағы құбырлар желісі сағатына 11 мың текше метрге дейін газ тасымалдап, 4 мыңнан аса үйді жылумен қамтуға мүмкіндік береді. Бұл Қараөткелде кәсібін бастаған азаматтар үшін де ісін кеңейтуде қолайлы жағдай туғызары анық. Ауылды газдандыру жобасының қалған екі кезеңі наурыз-сәуір айларында іске қосылады деп жоспарланып отыр.

Авторлары: Назым Кенжебай, Артур Горшняков