Алматы облысы Ақши ауылына ауыз су берілді

Алматы облысының Ақши елді мекеніне орталықтандырылған су құбырымен ауыз су беріле бастады.

Ауыл халқы қыстыгүні тіршілік нәрінсіз қалмауы үшін тез арада мердігер анықталып, ұзындығы екі шақырымнан асатын ескірген құбыр шұғыл ауыстырылды. 

6 қараша күні ұзындығы 72 шақырымдық «Бозой топтық су құбыры» жүйесінде апат болды. Жергілікті тұрғындар бір айға жуық Ақсай ауылдық округі мен Қонаевтан көліктермен тасымалданған суды пайдаланды. Облыс әкімі Марат Сұлтанғазиев аппараттық кеңес өткізіп, ұзындығы 2,6 шақырымдық ескірген су құбырын ауыстыруға 137 млн теңге бөлінді.

Динора Сафарова, Ақши ауылының тұрғыны:

- Өте қиын болды. Резервтен қаржы бөлініп, екі шақырымнан астам әбден тозған құбыр тез арада ауыстырылды. Міне, соның арқасында ауылымызға қайтадан ауыз су беріле бастады.

Құралай Амантаева, Ақши ауылының тұрғыны:

- Тәтті суымыз келіп жатыр. Біздің қуанышымызда шек жоқ. Сондықтан Алматы облысының әкімдігіне, осы ауызсудың келуіне себепкер болған үлкен азаматтарға алғысым шексіз.

Санэпидемиологтар Ақшидегі бірнеше үйге кіріп, су сынамасын алды. Оның қорытындысы екі-үш күнде шығады. Оған дейін су тасуға арналған көліктер тұрғындарға қызмет көрсете береді.

Нұрислам Сайлаубаев, "Бозой топтық су құбыры" мекемесінің басшысы:

- Осы магистралды құбырдың 72 шақырымын толық ауыстыру керек негізі мұндай проблема болмас үшін алдағы уақытта. Судың қысымы қазіргі кезде жақсы. Барлық жерде штаттық режимде жұмыс істеп тұр біздің насосный станцияларымыз. Сондықтан Ақши ауылына су бірқалыпты келіп тұр.

Былтыр Ақшиге жаңа ауызсу құбырын тарту жобасы жасалды. Мамандардың айтуынша, оның құны 7 млрд 400 млн теңге. Қажетті қаржы бөлінсе, Ақшидегі ауыз су тапшылығы түбегейлі шешіледі. 

Ардақ Айбарұлы, Аят Дүйсенбаев, Аманжол Жөңкешов