Түркістан облысында жер кезегіне тұрғандар саны 500 мыңнан асқан

Қазіргі таңда өңірде 10 сотық жер алуға ниетті азаматтардың саны үш есе артып, 508 451 адамға жеткен. Ал 2022 жылғы 1 наурызға дейін кезекте 140 мың адам болған.

Электронды есеп жүйесінің енгізілуі азаматтарға тұрақты тіркелген жеріне қарамастан, кез келген өңірге өтініш беруге мүмкіндік берді.

– 2022 жылдың бірінші тоқсанынан бастап Ауыл шаруашылығы министрлігінің жер кезегін есепке алатын электронды ақпараттық жүйесі іске қосылды. Бұл жүйе арқылы азаматтар тіркелген жеріне қарамай, бірнеше өңірде қатар кезекке тұра алады, – деді облыстық жер қатынастары басқармасы бөлімінің бас маманы Манатбек Ешмат.

Нәтижесінде бір жыл ішінде облыста жеке тұрғын үй құрылысына жер алуға өтініш берушілер саны үш есе өсіп, 500 мың адамнан асқан.

Көптеген өтінішке қарамастан, мемлекет енді инженерлік желілерсіз жер телімдерін бермейді. Ұлттық экономика министрінің талабына сәйкес, құрылысқа арналған жер тек инфрақұрылымы дайын аумақтардан ғана бөлінеді. Сондықтан өңірде 10 сотық жер үлестірудің негізгі кедергісі – инфрақұрылым мәселесі.

Инженерлік желілерді тарту қомақты қаржы мен ұзақ уақытты талап етеді.

– Жеке тұрғын үй құрылысына жер телімдері тек су және электр желілері тартылған алаңдарда ғана беріледі. Азаматтардың өтініштері арнайы есепке алынып, дайын алаңдар болғанда немесе бос жерлер пайда болған жағдайда кезек тәртібімен қамтамасыз етіледі, – дейді облыстық жер қатынастары басқармасының басшысы Ерғали Тілеген.

Ресми мәліметке сүйенсек, 2025 жылы аудан әкімдіктері 655 жер телімін әзірлеп, азаматтарға үлестірген. Бұл жер телімдері Бәйдібек, Қазығұрт, Ордабасы, Созақ және Келес аудандарына тиесілі.

– Қазіргі таңда аудан әкімдіктері жер телімдерін дайындау және оларды қажетті инфрақұрылыммен қамтамасыз ету жұмыстарын жүргізіп жатыр. Барлық инженерлік желілер тартылғаннан кейін, жер телімдері кезек бойынша азаматтарға беріледі, – деп хабарлады облыстық жер қатынастары басқармасы.

Инженерлік инфрақұрылым дайындалғанға дейін азаматтар өз кезегін күтіп, оның жылжуын тұрақты бақылап отыруы қажет.

Кезекті eGov.kz порталындағы «Жылжымайтын мүлік» – «Жер қатынастары» бөлімінде немесе жеке кабинеттегі «Қызметтерді алу тарихы» арқылы, сондай-ақ ашық кадастрлық карта геопорталындағы «Кезекте тұрғандар тізілімі» бөлімінде ЖСН енгізу арқылы тексеруге болады.

Сонымен қатар, eGov.kz порталында кезекке тұру қызметі қолжетімді. Азаматтар кез келген өңірді таңдап, өтінішті электрондық цифрлық қолтаңба арқылы растай алады.

Айта кетейік, тегін жер телімін алу құқығы бір рет қана беріледі. Яғни кезек қай өңірде жылдамырақ жылжыса, жер телімі сол өңірден ұсынылады.

Бұдан бұрын Түркістан қаласында 95 350 азамат жер телімін алу үшін кезекте тұрғанын жазған едік.

Сонымен қатар Шымкент қаласында жер кезегінде тұрғандар 283 мың адамға жеткені хабарланды.