Түркістан облысында спутник арқылы интернетпен қамтылған ауыл саны артты

Түркістан облысында заманауи OneWeb спутниктік жүйесі арқылы интернетпен қамтылған ауылдар саны артты.

Арыс қаласына қарасты халық саны аз, шалғайда орналасқан үш елді мекенге «Қолжетімді интернет» ұлттық жобасы аясында қоғамдық Wi-Fi тарататын спутниктік жүйе  орнатылды.

Ақтас, Бұлақ, Дарбаза ауылдарында халық саны жүзге жетпейді. Әр елді мекенде 20-30 түтіннен тұрады. Ауылда бастауыш мектеп пен амбуллатория ғана жұмыс істейді. Интернет болмағандықтан тұрғындар осы уақытқа дейін ұялы телефонмен сөйлесу үшін қырға шығып, тілдескендерін айтады. 

Күлайша Абдуллаева, Ақтас ауылының тұрғыны:

- Бұрындары бізде интернет болған емес, қандай қиын жағдайларда жұмыс істеп жүрдік. Жедел жәрдем шақырудың өзі қиын болған. Қай жерде сеть ұстайды, қырға шығамыз мысалы темір жолға шығамыз. Сөйтіп жүріп шақырған кездерімізде болды. Енді осы интернет қосылғалы бері жақсы болды. Төлемдер жасай беруге болады. Мысалы судың, жарықтың. Кино көріп жатқандар бар телефон арқылы, сол жаға өте жақсы болып жатыр бізге. 

Бұл елді мекендер аудан орталығынан шалғайда орналасқандықтан талшықты-оптикалық байланыс желілерін тарту немесе мобильді станциялар орнату экономикалық тұрғыдан тиімсіз деп танылған. Сондықтан жергілікті билік пен байланыс операторы интернеті мүлдем жоқ ауылдарға ғарыштық байланыс жүйесін пайдалануға келіскен. Нәтижесінде қоғамдық Wi-Fi тарататын заманауи спутниктік жүйе орнатылды. 

Тұрар Махамбетов, Арыс қаласы әкімдігі цифрландыру бөлімінің бас инспекторы: 

- Бұның ұстау көлемі 50 мен 150 метр арақашықтықта ұстайды. Осы Wi-Fi-ға жақын үйде тұратындардың барлығы тегін қолдана алады. Алысырақ тұратындар осы жерге келіп, әлеуметтік төлемдер, мемлекеттік көрсетілетін қызметтер, басқа да қызметтерді осы жерде алып отыр. Бізде қазір 2 елді мекен қалып тұр. 2027 жылға дейін ауылдық елді мекендерді сапалы интернетпен толық қамту жоспарда бар.

Жалпы үстіміздегі жылы Түркістан облысында байланысы мүлдем жоқ 10 ауылға заманауи One Web спутниктік жүйесі орнатылып, жергілікті тұрғындар тегін қоғамдық Wi-Fi желісіне қол жеткізді. 

Жандос Жұмабек, тілші:

- Айта кетейік, облыс аумағында 801 ауыл бар. Оның 740-ы мобильді интернетпен, ал 429-ы талшықты-оптикалық байланыс желісімен қамтылған. Жауаптылар қалған 372 елді мекенді оптика желісімен қамту үшін еліміздегі ең ірі байланыс операторы 14,7 млрд теңге инвестиция салатынын жеткізді. 

Жандос Жұмабек, Ерболат Әбіш, Қуаныш Әбуов