Қазақстанда 1 123 ауыл талшықты интернетпен қамтылады

Қазақстан Республикасы Цифрлық даму, инновациялар және аэроғарыш өнеркәсібі министрлігі «Қазақстанның инклюзивті экономикасы үшін жеделдетілген цифрландыру» жобасын бастады.

Жобаның мақсаты – ауылдық жерлерде жылдамдығы кемінде 100 Мбит/с болатын интернет желісін тарту. Аталмыш жоба аясында 1 123 ауылда талшықты-оптикалық байланыс желілері салынады, нәтижесінде 445 мыңнан астам үй шаруашылығы және шамамен 2,3 миллион адам жоғары жылдамдықты интернетке қол жеткізеді.

Жобаға қатысқан байланыс операторлары ауылдық жерлерде желі салуға жұмсалған шығындардың 50%-ына дейін грант ала алады. Құрылыс жұмыстары операторлардың қаражаты есебінен жүргізіліп, инфрақұрылым олардың теңгерімінде қалады.

Операторларды іріктеу ашық конкурс негізінде, теңдік, ашықтық және есептілік қағидаттарына сәйкес жүргізіледі.