Түркістандағы жасөспірім өлімі: барлық күдіктілер ұсталды

Түркістан облыстық полиция департаменті барлық күдіктілер анықталып, тергеу жүргізіліп жатқанын хабарлады.

— Күдіктілер ұсталды, қажетті тергеу әрекеттері жүргізіліп жатыр. Қылмыстық іс келесі айда сотқа жолданады деп жоспарланып отыр, — деп мәлімдеді ведомствоның баспасөз қызметі.

Сонымен қатар полиция қару қолдану мән-жайы мен шабуыл себептері туралы ресми түсініктеме тергеу толық аяқталғаннан кейін берілетінін нақтылады.

Қайғылы оқиғаның хронологиясы және куәгерлердің айғақтары

Оқиға 2025 жылғы 2 қарашаға қараған түні болған. Куәгерлердің айтуынша, шабуыл кенеттен жасалған. Бетперде киген ер адамдар көшеде тұрған жастарға оқ жаудырып, салдарынан Көктерек ауылының 17 жастағы тұрғыны қаза тапты. Сол түні ол ағасымен бірге дәріханаға барған. Тағы үш жас жігіт жарақат алып, ауруханаға жеткізілді.

Марқұмның туыстары жасөспірімнің ешқандай жанжалға қатысы болмағанын, кездейсоқ құрбан болғанын айтады. Анасы көзіне жас алып, ұлы соңғы сәтке дейін қарулы адамдардан қашуға тырысқанын еске алды.

Зардап шеккендердің бірі оқиғаның бәрі күтпеген жерден болғанын, шабуыл жасағандар тіл қатпастан, бірден оқ атқанын айтты.

Полиция қвзметкерлері алғашқы күдіктіні бір тәулік ішінде ұстады. Алайда оның сыбайласын іздеу ұзаққа созылды. Кейін оның жүрген жері анықталып, ол да қолға түсті.

Тергеу оқиғаның минут сайынғы барысын қалпына келтіріп, әр ұсталған күдіктінің қатысу деңгейін анықтап жатыр. Қылмыстық іс «Кісі өлтіру» бабы бойынша қозғалды. Тергеу барысы Түркістан облысы полиция департаменті басшылығының ерекше бақылауында. Алғашқы сот отырысы биыл мамыр айында өтеді деп жоспарланған.