Түркістандағы жол апаты: оқиғаның барлық мән жайы тергеледі

Түркістан қаласында болған қайғылы жол-көлік оқиғасы қоғамда үлкен резонанс тудырды, – деп хабарлайды Aikyn.kz сайты.

Апат салдарынан қаза тапқан полиция капитаны Бауыржан Қонысбековтың отбасы мен жақындарына жұртшылық көңіл айтып жатыр.

Оқиғадан кейін әлеуметтік желілерде жол апатына қатысты түрлі мәліметтер таралды. Атап айтқанда, екінші көлік шамамен 180 км/сағ жылдамдықпен қозғалғаны жөнінде ақпарат айтылуда. Бірақ бұл мәліметтер әзірге ресми түрде расталған жоқ.

Сондай-ақ, қызметтік автокөлік Тараз көшесінде жол қозғалысы ережесіне сәйкес келмейтін тұстан бұрылған деген де ақпарат тарауда. Бұл деректердің де анықтығын тек құзырлы органдар жүргізетін тергеу ғана анықтай алады. Ішкі істер министрі марқұм болған полицейдің отбасына көңіл айтты.