Оқушылар қатарласын жыныстық қатынасқа түсуге мәжбүрлеген: оқиғаның мән жайы

АЛМАТЫ, 17 қазан – Sputnik. Алматы облысы Жамбыл ауданы Қарғалы ауылындағы орта мектептен шу шықты. 7-сынып оқушысын "жыныстық қатынасқа" түсуге мәжбүрлеп, оны бейнекамераға түсірген балалардың видеосы мамандарды аяғынан тік тұрғызды. Оқиғаның мән-жайын Sputnik Қазақстан тілшісі біліп қайтты.

7,8,9-сынып оқушылары не ойын екені, не зорлық екені белгісіз жағаұстатарлық жайтты видеоға түсірген.

Бейнежазбада қызы бар, ұлы бар – жасөспірімдер қызды жатқызып, үстіне жас баланы шығарып, анайы әрекетке барған. Үстіне шыққан жеткіншектің жасы 10-да. Ол жан-жағынан қаумалағандардың айтқанын істеп, көрсеткенін қайталаған.

"13 қазан күні бір ата-ана келіп, ана бейнежазбаны көрсетті. Жағамды ұстадым. Бірден ата-аналарын шақырып, полицияға хабарластым. Екі ата-ана келді, ал жәбір көрдім деген қыздың асыраушысы Талғарда жұмыс істейді, ол түнгі сағат онда келді", - дейді №3 мектептің директоры Гүлзар Сераждинова.

Бұл жайдан күдікті балалардың ата-аналары хабардар болған. Дәл сол күні полиция пунктінде ювеналды полициямен қоса, прокуратураға да хабарлама жасалған.

"Ұялы телефондарын тексергенде балалардың бұрыннан араласатыны белгілі болған. Олар бір көшенің бойында тұратын достар. Аудандық полиция бөлімінің бастығы, криминалдық полиция, прокуратура келді. Сол жерде Қылмыстық кодекстің 124- бабы бойынша іс қозғалды", - дейді мектеп директоры.

Сорақысы сол, бейнежазба телеграм әлеуметтік желісіндегі тыйым салынған топқа салынған. Қазір балалар оқитын мектеп мазасыз күйде.

"Мен видеоны салған қыздан сұрап білдім. Телеграм каналда бір бот бар екен. Ол жерде әркім ойына келген бейнежазбаны сала береді екен. Ал жәбірленуші қыз ол бейнежазбаның жарияланғанын білмеген", - дейді директор.

Жәбір көрген оқушының анасы 2023 жылы жол апатынан қайтыс болған. Қазір нағашы әпкесінің қамқорлығында. Мына жағдайдан қамқоршысы мүлдем хабарсыз болып шыққан.

"Баланың көңіл-күйі қалыпты. "Мені ешкім зорлаған жоқ. Ол кішкентай бала ғой, қалай зорлайды" деді. Не үшін бұлай істегенін сол күйі түсінбедік. Күдікті деген екі баланың ата-анасы ғана балаларының кінәсін мойындап жатыр", - дейді Гүлзар Сераждинова.

Бейәдеп қылық жасаған балалар өз әрекетін мойындамаған. Ең қиыны – балалар өз әрекетін толық түсіне қойған жоқ.

Жәбір көрген оқушының сабақ үлгерімі орташа болғанымен, ашық-жарқын, кез келген адаммен бірден тіл табыса кетеді, дейді мұғалімдері.

Бейәдеп әрекетке 4 қыз, 4 ұл қатысқан.

Оқиға туралы Sputnik Қазақстан тілшісі жәбірленушінің қамқоршысынан сұрап көрді.

"Қазір бәлен деп ешнәрсе айта алмаймын. Мынау кінәлі деп те біреудің баласын көрсете алмаймын. Болар іс болды. Шулап жатыр, айтып жатыр. Қазір тергеу жүріп жатыр. Соншама дабыра етіп, шулатып жіберді. Олай істеудің қажеті жоқ еді. Қазір экспертиза жүріп жатыр, басқа ешнәрсе айта алмаймын", - дейді жәбірленуші баланың қамқоршысы Арзыгүл.

Алматы облыстық полиция департаментінің мәліметінше Қылмыстық Кодекстің 124-бабы бойынша іс қозғалған. Қазіргі уақытта тергеу жүріп жатыр.