Тұтынушылық несие және ипотека бойынша мөлшерлеме өзгеретін болды

Қазақстанда тұтынушылық және ипотекалық несиелердің пайыздық мөлшерлемелері қайта қаралады. Қаржы нарығын реттеу және дамыту агенттігінің төрағасы Мәдина Әбілқасымованының айтуынша, жаңа әдістеме 2026 жылдың шілдесіне дейін әзірленіп,  халық үшін несиелеу шарттарын жеңілдетуге бағытталады, деп хабарлайды Egemen.kz.

Фото: Ашық дереккөз

Мәжіліс отырысында депутат Тілектес Адамбеков ел азаматтарын алаңдатқан сұрақты көтеріп, тұтынушылық және ипотекалық несиелердің қашан арзандайтынын сұрады. Мәдина Әбілқасымова бұл бағытта нақты жұмыстар жүргізіліп жатқанын айтты. Оның сөзінше, соңғы екі жылда агенттік несиелік мөлшерлемелерді төмендету үшін заңнамалық және реттеуші өзгерістер енгізген.

«Өткен жылы қабылданған заңнан кейін біз тұтынушылық несиелердің мөлшерлемесін 56 пайыздан 46 пайызға, ипотекалық несиелерді 30 пайыздан 25 пайызға дейін төмендеттік. Ал кепілсіз несиелер бойынша мөлшерлеме 45 пайыз деңгейінде бекітілді», деді ол.

Әбілқасымованың айтуынша, 2025 жылы ипотекалық несиелердің пайыздық мөлшерлемесін 20 пайызға дейін түсіру мүмкін болған. Алайда Ұлттық банк базалық мөлшерлемені 18 пайызға дейін көтерген соң, кейбір банктер ипотекалық өнімдерді уақытша тоқтатуға мәжбүр болған.

Сондықтан ҚНРДА ипотекалық мөлшерлемелерді төмендету туралы норманы 2026 жылдың 1 шілдесіне дейін ұзартты. Осы уақытқа дейін агенттік Ұлттық банкпен бірлесіп жаңа есептеу әдістемесін әзірлейді. Жаңа жүйе базалық мөлшерлемемен тікелей байланыстырылып, нарықтағы өзгерістерге икемді болмақ.

«Қазір тұтынушылық несиелердің орташа мөлшерлемесі 35–36 пайыз шамасында. Біз жаңа әдістеменің осы деңгейден аспайтынына сенеміз. Сонымен қатар, нарықтағы бәсеке күшейген сайын мөлшерлемелер одан әрі төмендеуі мүмкін», деді Мәдина Әбілқасымова.