Үгіт науқаны басталғалы партиялардың электоралды рейтингі өзгерді

Фото: ҚСЗИ

16-26 шілде аралығында face-to-face форматында өткен сауалнамаға 4 мың респондент қатысты. Зерттеу барысында саяси партиялардың қазіргі рейтингі, сайлаушылардың таңдауына әсер ететін факторлар мен сайлауға қатысуға дайындық деңгейі сараланды. Сондай-ақ 3-13 шілде аралығында жүргізілген алғашқы сауалнамамен салыстырмалы талдау жасалды.

Зерттеу нәтижесіне сәйкес, «Әділет» партиясы электоралды рейтинг бойынша көш бастап тұр. Оны қолдауға дайын екенін респонденттердің 65,1 пайызы білдірген.

Сауалнама: Ел тұрғындарының 70%-дан астамы сайлауда дауыс беруді жоспарлап отыр

Екінші орында «Ауыл» партиясы (5,9%) болса, үшінші орынға «Ақ жол» партиясы (4,7%) көтерілді. Осылайша, ол Respublica партиясын (4,6%) аз ғана айырмашылықпен басып озған.

Сондай-ақ Жалпыұлттық социал-демократиялық партиясы (4,2%) Қазақстан Халық партиясынан (4,1%) сәл алға шыққан. Ал «Байтақ» жасылдар партиясының рейтингі 0,5 пайызға дейін төмендеген.

Зерттеу барысында «Барлығына қарсы» дауыс беруге ниеттілердің үлесі 2,5 пайызға дейін азайғаны анықталды. Сонымен қатар нақты таңдау жасамаған азаматтардың үлесі де 14,2 пайыздан 8,4 пайызға дейін қысқарған.

Азаматтардың сайлауға қатысуға дайындығы да өскен. Респонденттердің 73,2 пайызы 23 тамызда өтетін Құрылтай сайлауына қатысатынын мәлімдеген. Ал 13,2 пайызы дауыс беруге ниетті емес екенін айтса, 13,6 пайызы бұл мәселеде әлі нақты шешім қабылдамаған.

Сауалнама қай партиялардың бір электоратқа таласатынын көрсетті

Сауалнамаға қатысушылардың басым бөлігі – 64,3 пайызы саяси партиялардың сайлауалды бағдарламаларымен таныс екенін жеткізген. Оның ішінде 19,3 пайызы бағдарламаларды тұрақты түрде оқитынын айтса, 45 пайызы олармен ақпарат құралдары мен ақпараттық кеңістікте жарияланған кезде танысатынын көрсеткен.

Зерттеу авторларының пікірінше, партиялардың сайлаудағы нәтижесі олардың үгіт-насихат жұмысының тиімділігіне және сайлаушылармен ашық байланыс орната алуына тікелей байланысты.

Еске сала кетейік, елімізде Құрылтай сайлауы 23 тамызға белгіленді.