Үйде үлесі бар қазақстандықтарға жақсы жаңалық: Отбасы банк шектеуді алып тастады

Отбасы банк мемлекеттік тұрғын үй бағдарламаларына қатысу тәртібіне маңызды өзгеріс енгізгенін мәлімдеді, – деп хабарлайды Aikyn.kz сайты.

1 ақпаннан бастап пәтерде немесе жеке үйде үлесі бар азаматтар да жеңілдетілген ипотека алуына немесе жалдау ақысын субсидиялау бағдарламаларына қатысуына мүмкіндік алады.

Осы уақытқа дейін тұрғын үйде қандай да бір үлесі бар қазақстандықтар үлестің көлеміне қарамастан, тұрғын үй кезегіне тұра алмайтын. Бұл шектеу әлеуметтік әділетсіздік тудырып, азаматтар тарапынан көп сынға ұшыраған болатын. Отбасы банк аталған өзгеріс халықтан түскен көптеген өтінішке байланысты қабылданғанын хабарлады.

Банктің негізгі өнімі – тұрғын үй құрылыс жинақтары жүйесіне негізделген ипотека. Бұл жүйе бойынша клиент депозит ашып, кемінде үш жыл бойы қаражат жинауы тиіс. Осы мерзім ішінде банк сыйақысы мен мемлекеттің сыйақысын есепке ала отырып, тұрғын үй құнының кемінде 50 пайызын жинақтаған соң, азамат 3,5-5 пайыздық төмен мөлшерлемемен ипотекалық қарыз ала алады. Несие мерзімі 25 жылға дейін, ал сомасы 100 млн теңгеге дейін жетеді.

Сонымен қатар  Отбасы банк мемлекет қаржыландыратын жеңілдетілген бағдарламаларды да жүзеге асырып келеді. Бұл бағдарламалар аясында азаматтар алдын ала қарыз ала алады. Ол үшін тұрғын үй құнының кемінде 20 пайызын (кей жағдайда 50 пайызға дейін) жинақтау қажет. Үш жылдан кейін алдын ала қарыз стандартты тұрғын үй несиесіне ауыстырылып, пайыздық мөлшерлеме 5-8 пайыздан 3,5-5 пайызға дейін төмендейді. Бұл кезеңде банк негізгі қарызды өтеуді талап етпейді, тек пайыздары есептеледі.

Бұдан бөлек, Отбасы банк жалдау ақысын субсидиялау бағдарламаларын да ұсынады. Мұнда төлем мөлшері айлық есептік көрсеткіш пен өңірлік коэффициентке байланысты есептеледі.

Айта кету керек, бұл өзгеріс әзірге жеке нормативтік құқықтық актімен бекітілмеген және ресми құжаттарда нақтыланбаған. Соған қарамастан, банк оны тәжірибеде қолдана бастағанын мәлімдеді.