Үкімет жанынан Салық кодексін енгізу жөніндегі жобалық кеңсе құрылады

Үкімет жанынан Салық кодексін енгізу жөніндегі жобалық кеңсе құрылады. Онда апта сайын бизнес тарапынан келіп түскен өтініштер қаралады.

Премьер-министрдің орынбасары – ұлттық экономика министрі Серік Жұманғариннің төрағалығымен жаңа жобалық кеңсенің жұмысын ұйымдастыру жөніндегі бірінші кеңес өтті. Мақсат - мемлекеттік органдардың іс-қимылын үйлестіріп, кәсіпкерлік қоғамдастықпен тұрақты байланыс орнату. Жобалық кеңсенің бірінші отырысына «Атамекен» ҰКП басшылығы, кәсіпкерлердің құқықтарын қорғау жөніндегі уәкіл Қанат Нұров, орталық мемлекеттік органдардың өкілдері қатысты. Серік Жұманғарин Жобалық кеңсе бизнес мәселелерін жедел және жүйелі түрде шешу үшін құрылатынын жеткізді. Жыл басынан бері елде 22 мың жаңа салық төлеуші тіркелді. Олардың 20 мыңнан астамы - жеке кәсіпкер.

Серік Жұманғарин, ҚР Премьер-министрінің орынбасары –  ұлттық экономика министрі:

- Біз жаңа Салық кодексін іске асырудың практикалық кезеңіне қадам бастық. Бұл нормалар нақты экономикада, іске аса бастайтын ең жауапты кезең. Бүгінде бизнестің негізгі сұрақтары практикалық сипатқа ие. Біз кәсіпкерлердің басым бөлігі салық заңнамасынан тұрақтылық пен болжамдылық күтетінін жақсы түсінеміз. Үкімет жанынан Салық кодексін енгізу жөніндегі жобалық офис құрылып жатыр. Бұл бизнестің барлық сұрақтары жинақталып, келісілген шешімдер қабылданып, мемлекеттің бірыңғай ұстанымы қалыптасатын үйлестіру алаңы болмақ.