Украина ИКАО ны Ресей үстіндегі ұшу қауіптілігі туралы ресми түрде ескертті

Киев халықаралық авиациялық билік орындарына Ресей аспанындағы азаматтық ұшақтар үшін қауіп-қатердің артып келе жатқаны туралы ресми түрде хабарлады, деп хабарлайды Tengrinews.kz Euronews басылымына сілтеме жасап.

Сәрсенбі күні сыртқы істер министрі Андрей Сибига Украина Халықаралық азаматтық авиация ұйымына (ИКАО) Ресейдің әуе кеңістігі азаматтық рейстер үшін қауіпті екенін ресми түрде мәлімдегенін айтты.

"Ресей өз міндетін орындаудан және ақпараттандырудан бас тартса да, ИКАО-ны, барлық әуекомпаниялар мен үкіметтерді сақтық шараларын сақтауға шақыру - біздің жауапты шешіміміз. Біз кездейсоқ оқиғалардың алдын алғымыз келеді", - деп жазды Сибига X желісінде.

Ресми мәлімдеме Украина президенті Владимир Зеленскийдің әуекомпанияларға, сақтандырушыларға және Ресейдің негізгі әуежайларын пайдаланатын бизнес өкілдеріне ескерту жасағаннан бір күн өткен соң жолданды. Зеленский Киевтің алыс қашықтықтағы дрондармен операцияларын кеңейтуіне байланысты ел аспаны барған сайын қауіпті болып бара жатқанын айтқан еді.

Зеленский Украинаның азаматтық авиацияға қауіп төндірмейтінін, алайда Ресей аумағында украиндық дрондардың операциялар ауқымының ұлғаюына байланысты бұл тәуекелдерді енді ескерусіз қалдыруға болмайтынын атап өтті.

Reuters пен Flightradar24 мәліметінше, 2 қыркүйекте Мәскеу әуежайларында рейстердің жаппай кешігуі мен тоқтатылуы тіркелген.

Шереметьевода 235 рейс кешіктіріліп, 21-і тоқтатылды, Внуково әуежайында 94 рейс кешігіп, 22-сі жойылды.

Украинаның әуе кеңістігі 2022 жылдың 24 ақпанынан бастап азаматтық авиация үшін жабық. Ал Ресейдің азаматтық авиациясы, керісінше, соғыс басталғалы жұмысын жалғастырып келеді.

Басылымның жазуынша, Ресейдің әуе кеңістігі арқылы әлі де айтарлықтай көлемде халықаралық жолаушылар тасымалы жүзеге асырылып жатыр.

Еуропалық және америкалық әуекомпаниялар 2022 жылы Ресей үстімен ұшуды тоқтатты. Алайда Emirates, Turkish Airlines, Air India, Etihad және Qatar Airways сияқты ірі тасымалдаушылар, сондай-ақ бірнеше қытайлық авиакомпания Ресейге рейс жасауды және оның аумағы арқылы транзиттік ұшуларды жалғастырып келеді.

Google News арқылы жаңалықтарымызды қадағалаңыз