Украина мен еуроүштік лидерлері бейбітшілік орнатудың бес шартын атады

Германия, Ұлыбритания, Франция және Украина лидерлері Лондондағы кездесуде Украинада әділ әрі баянды бейбітшілікке қол жеткізудің бес шартын айқындады, деп хабарлайды Tengrinews.kz тілшісі DW басылымына сілтеме жасап.

Германия, Ұлыбритания, Франция және Украина лидерлері Лондондағы кездесуде Украинада әділ әрі баянды бейбітшілікке қол жеткізудің бес шартын айқындады, деп хабарлайды Tengrinews.kz тілшісі DW басылымына сілтеме жасап.

Фридрих Мерц, Кир Стармер, Эммануэль Макрон және Владимир Зеленский Лондондағы кездесу барысында бірлескен мәлімдеме жасады, ол жексенбі, 7 маусымда британ үкіметінің сайтында сайтында жарияланды.

Олар Киев пен Мәскеу арасындағы ықтимал бейбіт келіссөздерге еуропалық елдердің "белсенді қатысуы" қажеттігін мәлімдеді.

Кездесу кезінде, атап айтқанда, Ресей экономикасына қысымды күшейту, Украинаға әскери көмекті ұлғайту, әуе қорғанысына және алыс қашықтыққа соққы беруге қажетті зымырандарды бірлесіп шығару мәселелері талқыланған.

Кездесуге қатысушылардың пікірінше, Украинадағы баянды бейбітшіліктің бес шарты

Бірінші шарт – соғыс қимылдарын тоқтату.

Екінші - қазіргі түйісу сызығы келіссөздердің бастапқы нүктесіне айналуы тиіс.

"Халықаралық шекаралар күшпен өзгертілмеуі керек, ал Украинаның өз қауіпсіздігін қамтамасыз ету механизмдерін дербес анықтауға және одақтарды таңдауға деген егеменді құқығы мүлтіксіз сақталуы тиіс", - делінген бірлескен мәлімдемеде.

Үшінші шарт бойынша, оқ атуды тоқтату режимі күшіне енгеннен кейін Украина заңды түрде міндеттейтін қауіпсіздік кепілдіктерін алуы керек, оған Украинада көпұлтты күштерді орналастыру да кіреді.

"Төртіншіден, Ресей агрессиялық соғысты тоқтатып, Украинаға соғыс қимылдары кезінде келтірілген шығынды өтегенге дейін ресейлік активтер бұғатталған күйінде қалады", - делінген мәлімдемеде.

Соңында, бесінші шарт кез келген уағдаластық еуропалық қауіпсіздік мүдделерін қорғауды қамтамасыз етуі тиіс дегенге саяды. Келіссөздердің Еуропалық Одақ пен НАТО-ға қатысты бөлігі ЕО елдері мен Солтүстік Атлантикалық альянс одақтастарының келісімін талап етеді.

Еске сала кетейік, бұған дейін Украина президенті Ресей президенті Владимир Путинге ашық хат жариялап, онда басқа мәселелермен қатар соғысты аяқтауды және олардың жеке кездесуінің "нақты күнін" белгілеуді ұсынған болатын.

Зеленскийдің хатына жауап ретінде Путин келесі күні-ақ олардың кездесуінен әзірге "ешқандай мағына көрмейтінін" мәлімдеді. Кремль басшысы хаттың мазмұнында "дөрекілік элементтері" бар және "ықтимал кездесуге кедергі келтіреді" деп атап, сондай-ақ "соғыс қимылдары ерте ме, кеш пе аяқталады және біздің (Ресейдің - ескертпе) алға қойған мақсаттарымызға қол жеткізуімізбен аяқталады" деп мәлімдеді.