Ұлттық аңшылықтан Қазақстан құрамасының мүшесі тұтқындалды

Қарағандыда Қазақстанның Қызыл кітабына енген сирек кездесетін жыртқыш құстарды заңсыз сатып алды және асырады деп айыпталған жергілікті тұрғынға қатысты қылмыстық істі тергеу аяқталды. Бұл туралы Қаржылық мониторинг агенттігі хабарлады, деп жазады Tengrinews.kz.

Не болды?

Тергеу мәліметтері бойынша, күдікті 2017 жылдан бастап Қарағандыдағы үйінің аумағында заңсыз тәлімбақ ұйымдастырған. Ер адам "Құсбегілік" федерациясының және Қазақстанның ұлттық құсбегілік құрамасының мүшесі болған.

Тергеудің болжамынша, ол Instagram желісіндегі ұлттық аңшылыққа, құстарды баптау мен емдеуге арналған парақша арқылы табиғи ортадан заңсыз ұсталған сирек кездесетін жыртқыштарды жеткізіп берушілермен байланыс орнатқан.

Тінту барысында құқық қорғау органдарының қызметкерлері 35 жыртқыш құсты тәркіледі. Олардың арасында ителгі, бүркіт және лашын бар. Бұл құстардың барлығы Қазақстанның Қызыл кітабына енген және сирек кездесетін, жойылып кету қаупі төнген түрлерге жатады.

Күдікті қамауға алынды. Сот шешімімен оған тиесілі Toyota 4Runner автокөлігіне де тыйым салынған.

Қылмыстық іс сотқа жолданды.

Тәркіленген құстар уақытша Қарағанды хайуанаттар бағына тапсырылды. Сот үкімі заңды күшіне енгеннен кейін оларды табиғи ортасына жіберу жоспарланып отыр.

Google News арқылы жаңалықтарымызды қадағалаңыз