Ұлттық банк басшысынан доллар бағамы туралы сұралды

Ұлттық банк төрағасы Тимур Сүлейменов доллар бағамы 515 теңгеге дейін көтерілуі мүмкін бе деген сұраққа жауап берді. Бұл туралы Сенат кулуарында журналистер сұрады, деп хабарлайды Tengrinews.kz.

Ұлттық банк төрағасы Тимур Сүлейменов доллар бағамы 515 теңгеге дейін көтерілуі мүмкін бе деген сұраққа жауап берді. Бұл туралы Сенат кулуарында журналистер сұрады, деп хабарлайды Tengrinews.kz.

Атап айтқанда, Сүлейменовке кейбір сарапшылар бағамның бір доллар үшін 515 теңгеге дейін өсетінін болжап отырғаны айтылды.

"Маған бұл болжамдар белгісіз, сондықтан түсініктеме бере алмаймын", - деп жауап берді Ұлттық банк басшысы.

Ұлттық валютаның мұншалықты әлсіреуіне алғышарттар бар ма деген нақтылаушы сұраққа Тимур Сүлейменов реттеуші мұндай негіздерді көріп тұрған жоқ деп мәлімдеді.

"Мен бірнеше рет айтқанмын: бізде іс жүзінде ешқандай алғышарт жоқ. Бізде бір алғышарт болған кезде де: базалық мөлшерлеме 17 пайызға дейін төмендеді, теңгелік активтердің тартымдылығы төмендейді, демек, бағамның күрт өсуін көреміз деген болатын. Олай болған жоқ. Бағам тіпті бір теңгеге де өзгерген жоқ - 487–488 деңгейінде қалай саудаланса, солай қалып отыр", - деді Сүлейменов.

Ұлттық банк басшысы АҚШ пен Иран арасындағы алдын ала уағдаластықтар туралы хабарлардан кейін әлемдік мұнай бағасының төмендегеніне назар аударды.

"Мұнай бағасы құлдырады. Ол 100 доллар шамасында болса, қазір - таңертең 78 болды-ау деймін. Бұл да теңгеге айтарлықтай әсер еткен жоқ", - деп атап өтті ол.

Сүлейменовтің айтуынша, нарық қатысушылары макроэкономикалық тұрақтылықты және биліктің инфляциямен күресу ниетін көріп отыр.

"Сарапшылар да, нарық та, жалпы ойыншылар да макроэкономикалық тұрақтылықты, инфляциямен күреске және сапалы инклюзивті өсуге бағытталған мақсаттарды көріп отыр. Сондықтан осы жағдайда теңге өзін айтарлықтай нық ұстап тұр", - деп түйіндеді Ұлттық банк төрағасы.

5 маусымда Ұлттық банк кейінгі 2 жылда алғаш рет базалық мөлшерлемені жылдық 18 пайыздан 17 пайызға дейін төмендетті. Осыдан кейін Тимур Сүлейменов теңгелік активтер тартымдылығын сақтап отырғандықтан, реттеуші бұл шешімге байланысты теңгенің әлсіреуін күтпейтінін мәлімдеген болатын.

Ұлттық банктің жаңартылған макроэкономикалық сауалнамасында 2026 жылға арналған доллар бағамының болжамы 515-тен 498,8 теңгеге дейін қайта қаралды.