Ұлттық банк базалық мөлшерлемені 18% деңгейінде қалдырды

АСТАНА, 6 наурыз – Sputnik. Қазақстанның Ұлттық банкі базалық мөлшерлемені 18% деңгейінде қалдыруға шешім қабылдады.

Жылдық инфляция 2026 жылғы ақпанда болжамдарға сай келіп, 11,7%-ға дейін төмендеді (қаңтарда – 12,2%).

"Инфляцияның барлық компоненті қарқынның төмендеп келе жатқанын көрсетіп отыр. Азық-түлік тауарларының бағасы 12,7% (12,9%) өсті, азық-түлікке жатпайтын тауарлар бойынша – 11,6% (11,7%), ақылы қызметтер бойынша – 10,8% (12%) болды", - деп жазылған Ұлттық банктің хабарламасында.

Дегенмен, айлық инфляция 2026 жылғы ақпанда жеделдеп, 1,1%-ды құрады. Базалық инфляция ақпанда 0,8% болды.

Базалық сценарий аясында бірінші жартыжылдықта Brent маркалы мұнайдың бағасы Таяу Шығыстағы қақтығыстың өршуіне байланысты сақталып отырған жоғары бағалар аясында бұрынғы алғышарттардан уақытша жоғары болады деп болжанды.

"Бұдан кейін әлемдегі сұраныс пен ұсыныс теңгерімінің нәтижесінде мұнай бағасы 1 баррель үшін 60 АҚШ долларына жуық деңгейге дейін біртіндеп төмендейді деп болжанады. Болжамға сәйкес, 2026 жылы баға орта есеппен 1 баррель үшін 66,3 АҚШ долларын құрап, кейінгі жылдары 60 АҚШ доллары деңгейінде тұрақталады", - делінген хабарламада.

Неғұрлым жоғары мұнай бағасын ескере отырып, 2026 жылға инфляцияның болжамы нақтыланды. Бағалардың өсуі 9,5-11,5 шегінде бағаланады. 2026 жылы ЖІӨ 3,5-4,5% аралығында өседі деп болжанған.

Инфляция тұрақты баяулап, жаңа инфляциялық шоктар болмаған жағдайда 2026 жылдың екінші жартыжылдығында базалық мөлшерлемені төмендету мүмкіндігі қаралады.

Базалық мөлшерлеме бойынша кезекті жоспарлы шешім 2026 жылдың 24 сәуірінде Астана қаласы уақытымен сағат 12:00-де жарияланады.