Ұлттық статистика бюросы инфляцияны есептеудің жаңа тәсілін енгізеді

2026 жылғы қаңтардан бастап ҚР СЖРА Ұлттық статистика бюросы тұтыну бағалары индексін (инфляцияны) есептеудің жаңартылған әдісін енгізеді.
Енді инфляцияны есептеу кезінде дүкендер мен интернет-дүкендердегі бағалармен қатар, бақылау-касса машиналары арқылы тіркелген фискалдық түбіртек деректері де пайдаланылады.

Бұл халықтың нақты сатып алулары мен төленген бағалары туралы анағұрлым дәл ақпарат алуға мүмкіндік береді. Жаңашылдық мемлекеттік статистиканы дамыту тұжырымдамасы мен ұлттық деректер экожүйесі аясында жүзеге асырылып отыр.

Фискалдық деректерді пайдалану үшін арнайы кешенді әдістеме әзірленген. Ол деректерді тазалау, тауарларды автоматты түрде жіктеу, топтау және индексті есептеудің заманауи динамикалық тәсілдерін қамтиды. Әдістеме Халықаралық валюта қоры мен Дүниежүзілік банк тарапынан оң бағасын алған.

Ұлттық статистика бюросының мәліметінше, бүгінде талдауда 60 миллионнан астам фискалдық түбіртек деректері қолданылады. Мұндай тәжірибе әлемде санаулы елдерде ғана бар.