Ұлыбританияда босқындар әскери казармаларға көшіріледі

Британия үкіметі қонақүйлерде тұрып жатқан босқындарды бұрынғы әскери казармаларға көшіруді ұйғарды.

Оған кететін шығын шаш етектен болса да, билік айтқанынан қайтар емес. Себебі халықтың көпшілігі босқындардың салық төлеушілер есебінен қонақүйлерде тұрып жатқанына наразы. 

900 ер адамнан тұратын босқындардың алғашқы тобы қараша айының соңында Шотландия мен Англиядағы екі әскери нысанға көшірілмек. Алдағы уақытта үкімет 10 мыңға жуық адамды казармаларға қоныстандыруды жоспарлап отыр. Билік бұл қадам қоғамдағы наразылықтарды азайтып, қонақүйге кететін шығынды қысқартады деп есептейді.

Кир Стармер, Ұлыбритания премьер-министрі:

- Мен қонақ үйлерді жабуға бел будым. Босқын мәртебесіне өтініш беру процесін жеделдетіп, елде қалуға құқығы жоқ адамдарды жиірек депортациялаймыз. Біз нақты шаралар қабылдап жатырмыз, дегенмен алдыңғы үкіметтің былығы мені қатты қынжылтады.

Алдыңғы үкімет те босқындарды әскери-әуе базаларына көшіру арқылы қаражат үнемдеуді көздеген еді. Алайда аудит мұндай қадам қонақ үйге орналастырғаннан да қымбатқа түсетінін айтып, райынан қайтарды. Бұдан бөлек қазіргі билік «цифрлы жеке куәлік» жүйесін енгізуді жоспарлап отыр. Жергілікті тұрғындар  мен елде заңды тұру құқығы бар азаматтар  оны смартфонға жүктеп алуы тиіс. Мақсат - заңсыз жұмыс істейтіндер мен тіркеусіз өмір сүретіндерге тосқауыл қойып, көші-қон легін  қатаң бақылауға алу.

Шабана Махмуд, Ұлыбритания Ішкі істер министрі:

- Біз елдегі тәртіп пен бақылауды қалпына келтіруіміз керек. Ұлыбритания үнемі қауіп-қатерден қашқан адамдарға баспана мәртебесін беретін ел болып қала береді. Бірақ кімнің кіріп, кімнің шығуы керектігін өзіміз шешуіміз қажет. Атқарар жұмыс көп.

Соңғы уақытта мигранттарға қарсы жиілеп кеткен наразылықтар мәселенің өзектілігін көрсетіп  отыр. Маусым айындағы деректерге сүйенсек, шамамен 30 мың босқын қонақүйлерді паналап жүр. Бұл 2023 жылғы көрсеткіш - 55 мың адамнан азырақ болғанымен, өткен жылмен салыстырғанда әлдеқайда көп. Ал оларды орналастыруға кететін шығын үш еседен артық өсіп отыр.

Авторы: Ғалымжан Қараманұлы