Ұлытау облысына оңтүстіктен 28 отбасы көшіп келеді

Биыл Ұлытау облысына мемлекеттік бағдарлама аясында оңтүстік өңірден 28 отбасы қоныс аударады. Оларды жұмыспен қамту және тиісті көші-қон көмегін беру үшін арнайы жоспар жасалып, қаржы бөлінді. 

Алдағы уақытта мамандар оңтүстік өңірлерді аралап үгіт-насихат жұмыстарын жүргізеді. Мансап орталығының мамандары көшіп келген отбасылар негізінен халық саны аз ауылдарға қоныстандырылады дейді. 

Ерлі-зайыпты Арман мен Лиза  мемлекеттік бағдарлама  бойынша тамыз айында Жезді кентіне көшіп келді. Екеуі де жоғары білімді мұғалім. Киелі Түркістаннан қасиетті Ұлытауға қоныс аударған жұп «таңдауымызға еш өкінбейміз» дейді. Жобаның шарты бойынша тиісті қолдау шаралары толығымен орындалған. Қазір екеуі де осындағы мектеп-интернатта жұмыс істейді.

Лиза Нұрділла, Жезді кентінің тұрғыны:

-Бізге уәде етілген жол ақымызды, келген кезде берілетін сома берілді. Сонымен қатар әкімшілік тарапынан қызметтік үй берілді. Келген кезде әріптестеріміз жақсы күтіп алды. Қуанды әрине. Иә, алғашында оңай болған жоқ. Өзге жер, өзге орта. Адамдар қалай қабылдайды, бұл жақта бізден ешқандай адам жоқ деген секілді. Алайда өзіміз қатарлы әрептестеріміздің қолдауымен үйренісу оңай болды. 

Былтыр оңтүстіктен көшіп келген 27 отбасының тең жартысы ауылдық жерді таңдаған. Мал шаруашылығымен айналысуға ниеттілерге жер телімі конкурссыз берілді. Ал Жезді кентіне төрт отбасы қоныстанды. Олар негізінен елдімекенде тапшы мамандық иелері. 

Мұратбек Жұмабек, Жезді кентінің әкімі:

- Білім саласына қанша маман қажет, оның ішінде мұғалімі қанша, қаншамасы лаборант және де аурухана,медициналық ұйымдар арқылы оларға қажет мамандардың барлығын жинап аудан әкімдігіне береміз. Аудан әкімдігі соған қарап жоспар жасайды. Ең өзекті дегендер мұғалімдер, бірінші кезекте мұғалімдер. Содан кейін дәрігерлер. 

Облысқа қоныс аударған отбасыларға мемлекет тарапынан бірқатар әлеуметтік қолдау қарастырылған. Отбасыға көшуге арналған субсидия төленеді және оның әр мүшесіне 70 АЕК мөлшерінде бір реттік қаржылай көмек беріледі. Кіретін дайын үй болмаса, бір жылға пәтер жалдап береді. Ал үй сатып алған жағдайда жарты ақшасын мемлекет өтейді. 

Айдар Қойшыбаев, облыстық Еңбек мобильдігі орталығының директоры:

- Үйдің бағасы 8 млн болса 4 млн алады, 7 млн болса  3,5 млн теңгесін мемлекет тарапынан субсидиялайды. Өңірімізде педагогтар, дәрігерлер және де мемлекеттік қызметкер мамандар тапшы. Қазіргі уақытта облысымызда 300-ге жуық мемлекеттік мекемелерде бос орындарымыз бар. Ал еңбек.кз порталында бүгінгі күнде 785 бос жұмыс орны бар. Оңтүстік өңірлерін азаматтарын өзімізге шақыру жұмыстарымен айналысып жатырмыз. 

Облыстық еңбек мобильділігі орталығы жобаға қатысуға тілек білдірушілер көп дейді.  Биыл өңірге 120 дан астам адамды көшіріп әкелу жоспарланып отыр. Алдағы күндері мамандар оңтүстік өңірлерді аралап үгіт-насихат жұмыстарын жүргізеді. Әрине таңдау барысында көпбалалы отбасыға және тапшы мамандық иелеріне басымдық беріледі. 

Авторлары: Елдос Кәкенов, Нұрлан Исмаилов, Гүлшаһира Серекбаева