Ұлытау облысында құрылыс қарқыны артып келеді

Ұлытау облысында жалпы сомасы 150 млн АҚШ долларынан асатын инвестициялық жобаларды жүзеге асыру жоспарланып отыр. Жергілікті билік бірнеше шетелдік компаниялармен меморандумдарға қол қойды. Бұл жобаларды іске асыру нәтижесінде жаңа өндіріс орындары ашылып, өңір үшін өзекті мәселелердің бірқатары шешімін табады.

Өңірде тұрғын үйлер, әлеуметтік нысандар мен өндіріс орындары салынып жатыр. Құрылыс материалдарына сұраныс көбейіп, тіпті жетіспеушілігі байқалуда. Әсіресе кірпіш тапшы. Қолданыстағы кірпіш зауыты нарықтағы қажеттіліктің тек бір бөлігін ғана өтейді. Сондықтан құрылыс компаниялары кірпішті өзге өңірлерден сатып алуға мәжбүр.

Газрахил Рамазанұлы, құрылыс компаниясының өкілі:

- Иә, шын мәнінде Жезқазған қаласында тек қана Жезқазған қаласы емес, жалпы Ұлытау облысында кірпіштің тапшылығы бар. Үлкен зауыт салынатын болса жақсы еді. Өйткені қаланың салынуына, жаңа жобалардың басталуына, жалпы қаланың кеңеюіне байланысты құрылыс материалы, кірпіштің тапшылығы бар. Егер де өзге қалаларда қазіргі таңда бағасы 65 теңгеден 80 теңгеге баратын болса, жолымен бірге келген кезде екі есе көп бағасы.

Инвестиция есебінен облыста жаңа кірпіш зауыты салынады. Кәсіпорынның орналасатын жері анықталып, жобаны іске асыру жұмыстары басталып кетті.

Данияр Арынғазин, Кәсіпкерлік және өнеркәсіп басқармасының басшысы:

- Жобаның инвестиция көлемі – 4 млрд теңге. Кәсіпорын іске қосылған кезде 80 жаңа жұмыс орны ашылады. Зауыттың жылдық өндірістік қуаттылығы 20 млн кірпішке дейін жетеді. Бұл өндіріс нысаны тек Ұлытау облысының ғана емес, көршілес өңірлердің де қажеттілігін өтеуге мүмкіндік береді.

Агроөнеркәсіптік кешен саласында инвесторлар соя мен жүгері өсіру, сондай-ақ мал азығын өндіру кәсіпорнына қаржы құюды жоспарлап отыр. Өңірде алғаш рет заманауи ет өңдеу комбинаты ашылатын болады. Сонымен қатар энергетика саласы бойынша  да шетелдік компаниямен ынтымақтастық орнаған.

Данияр Арынғазин, Кәсіпкерлік және өнеркәсіп басқармасының басшысы:

- Сұйытылған газ өндіретін зауыт салуға қызығушылық танытылуда. Өздеріңіз білесіздер, облысымыз арқылы «Сарыарқа» магистральді газ құбыры өтеді. Инвесторлар осы газ құбырына қосылып,  жаңа технологияларды пайдалану  арқылы табиғи газдан сұйытылған метан газын өндіруді көздеп отыр.

Инвестициялардың жалпы көлемі 150 млн АҚШ долларынан асады. Жобалар табысты жүзеге асқан жағдайда қосымша жұмыс орындары ашылып, өндіріс көлемі артады. Бұл өңірдің экономикасын  дамытуға жасалып жатқан маңызды қадамдардың бірі.

Авторлары: Қарлығаш Қасиетова, Елизавета Шалина, Нұрбол Үздікбаев, Гүлшахира Серікбаева.