Ұшақта ұйықтауға арналған жастық өткеннің еншісінде қалуы мүмкін

Emirates әуеакомпаниясы эконом-класс салондарында ұйқы кезінде бас пен мойынды сүйеуге арналған жаңа реттелетін U-Dream бас тірегіштерін орната бастады. Компанияның мәлімдеуінше, жаңа конструкцияның арқасында жолаушыларға бұдан былай ұшу кезінде жол жастықшасын өздерімен бірге алып жүрудің қажеті болмайды, деп хабарлайды Tengri Travel.

Emirates ұшақтарында жаңа бас тірегіштер пайда болады

U-Dream - эконом-класс орындықтарына біріктірілген, көппозициялы реттелетін бас тірегіш. Ол Safran Seats компаниясымен бірлесе отырып әзірленген. Былғарыдан жасалған бас тірегіштің жұмсақ негізі мен демалу кезінде бас пен мойынды ұстап тұру үшін ішке қарай бүктелетін иілгіш бүйірлік бөліктері бар.

Instagram-дағы бұл жарияланымды көру

Жарияланым авторы: Emirates (@emirates)

Конструкцияның биіктігі мен көлбеу бұрышы да реттеледі, бұл оны әртүрлі бойы мен дене бітімі бар жолаушыларға бейімдеуге мүмкіндік береді. Әзірлеушілердің айтуынша, бұл басты ыңғайлы қалыпта ұстауға көмектеседі және ұйқы кезінде оның алға немесе жан-жаққа қисаюына жол бермейді.

Emirates өкілдері U-Dream әуекомпанияның эконом-класта мұндай ауқымда енгізіп жатқан алғашқы шешімі екенін атап өтті. Бас тірегіш тәуелсіз сынақтардан өтіп, Еуропалық авиациялық қауіпсіздік агенттігінің (EASA) талаптарына сәйкес келеді.

Emirates Airline президенті сэр Тим Кларк жаңа әзірлеме ұзаққа созылатын ұшуларды жайлы ете түсетінін мәлімдеді.

"Emirates жолаушыларға қызмет көрсету сапасын арттыру мәселесінде ешқашан тоқтап қалмайды. Біз эконом-класс саяхатшылары үшін, әсіресе алыс қашықтыққа ұшу кезінде жайлылықты айтарлықтай жақсарта алдық. U-Dream мойынға толыққанды қолдау көрсете отырып, ұшу кезіндегі ұйқыға деген көзқарасты өзгертеді. Мойынға арналған жастықтар енді қажет болмайды. Бұл - біздің жолаушылардың мүддесіне адалдығымызды көрсететін тағы бір жаңалық", - деп атап өтті ол.

Әуекомпания жолаушылар реттеудің оңайлығын айтып, жаңа жүйеге оң баға беріп жатқанын хабарлады. Бортсеріктер арнайы оқудан өтті және қажет болған жағдайда бас тірегішті баптауға көмектеседі. Әр рейстен кейін ол салонның басқа жабдықтарымен бірге тазаланады.

U-Dreamed it, we did it. ✈️ Эконом-класта жақсы ұйықтаудың құпиясы мойынға арналған жастық болмаса ше? Emirates әлемдегі тұңғыш U-Dream бас тірегішін ұсына отырып, өз флотындағы миллиондаған клиенттерге бас пен мойынға арналған жеке қолдау жүйесін сыйлайды. https://t.co/mDjnEnDcDc pic.twitter.com/5Sv3V9WUOP

- Emirates (@emirates) 20 шілде, 2026 жыл

U-Dream жүйесі Emirates рейстерін орындайтын үш Airbus A350 ұшағына орнатылып үлгерді.

Жыл соңына дейін әуекомпания өз флотындағы барлық Airbus A350 ұшақтарын жаңа бас тірегіштермен жабдықтауды жоспарлап отыр. Бұдан бөлек, олар тасымалдаушы тапсырыс берген барлық 270 Boeing 777X лайнеріне орнатылады.

2027 жылдан бастап U-Dream жүйесін жаңартылған Airbus A380 және Boeing 777 ұшақтарына да орнату басталады.

Жаңа бас тірегіштер Emirates-тің барлық Airbus A350 ұшақтарында, сондай-ақ қайта жабдықталғаннан кейін Airbus A380 және Boeing 777 ұшақтарының көпшілігінде эконом-класс орындықтарының ажырамас бөлігіне айналады.

Осылайша, әуекомпания ең алдымен жолаушылар ұшу кезінде жиі ұйықтауға тырысатын және мойынды сүйеу үшін жол жастықтарын пайдаланатын ұзақ рейстерді жайлы етуді көздеп отыр. Жаңа конструкция бұл функцияны қосымша аксессуарларсыз-ақ тікелей орындықта орындауы тиіс.

Тағы оқыңыз: Еуропа елдерінде чемодандарға арналған бір реттік пленканы пайдалануға тыйым салынуы мүмкін

Google News арқылы жаңалықтарымызды қадағалаңыз