Үздік 2025 жобасы: жеңімпаздар марапатталды

Астанада «Үздік-2025» жобасы мәресіне жетіп, оның аясындағы байқауға қатысқан жеңімпаздар марапатталды.

Бір айға жуықтаған конкурста 35 жасқа дейінгі азаматтар бақ сынады. Жобаның өзі биылғы Жұмысшы мамандықтар жылына орайластырылды. 

32 жастағы Сағира Көптілеу Астана қаласының тұрғыны. Жобаның бастау алғанын білгенде, қатысуға ойланбастан өтінім берген. Тәжірибесі мен күшіне сенімді жас ару өз номинациясы бойынша бақ сынады. Сөйтіп байқау талаптарынан сүрінбей өтіп, жүлделі екінші орынды иеленді.

Сағира Көптілеу, байқаудың жүлдегері:

- Бұл байқау жайында мен әлеуметтік желіден көрдім. Өзімнің бағымды сынау үшін байқауға қатысуға ниет етіп, қазір қатысып 2-ші орын жүлдегері атандым. Көзге көрінетін де, көрінбейтін де мамандықтар болады. Бұл байқау бізге үлкен мотивация берді. Біздің еңбегімізді бір сөзбен айтқанда бағаланды десек болады.

Байқау 15 аталым бойынша ұйымдастырылды. Онда жиһаз өндіруші, флорист, шаштараз, аспазшы және механизатор секілді мамандар бақ сынап, үздіктері анықталды. Ал жалпы барлық номинация бойынша 350-ден астам өтінім түскен. Бұл конкурс қала әкімдігіне қарасты Жастар ресурстық орталығының қолдауымен өтті.

Арайлым Сапарәлі, «Астана жастары» Жастар ресурстық орталығының бөлім басшысы:

- Жоба жалпы 3 жылдан бері тұрақты түрде өтіп келе жатыр. Алдын ала өзіміздің әлеуметтік парақшаларда хабарландыру жариялап, арнайы сілтеме арқылы қатысушыларды тіркейміз. Әрбір бағыт бойынша 25-тен астам қатысушы өтінім білдірді. Қатысып, соңында іріктеліп алынған және жеңіске жеткен 45 жеңімпазды біз марапаттадық.

«Үздік-2025» жобасы жұмысшы мамандардың беделін арттырып, әсіресе елорда жастарының кәсіби шеберлігін шыңдауға және оларды қолдауға бағытталған. Жалпы бір ғана Астанада 14 пен 34 жас аралығындағы 481 мың азамат өмір сүреді. Олардың 61 пайызы тұрақты жұмыспен қамтылған. Ал NEET санатындағылардың үлесі 6 пайыздан асады.

Авторлары: Альмира Оразбай, Мерей Талап