Венгрия мен Словакия Еуроодақ саммитінде Украина бойынша шешімді қолдамады

АСТАНА, 19 наурыз – Sputnik. Брюссельде өткен Еуропалық одақ саммитінің Украинаға қатысты тұжырымын Венгрия мен Словакия қолдаған жоқ. Бұл туралы кездесудің қорытынды құжатында айтылған.

Киевке 90 миллиард еуро көлемінде несие бөлуге қатысты мәлімдемені 27 елдің 25-і қолдады. Шешім қабылдануы үшін барлық қатысушы елдің келісімі қажет еді. Соған қарамастан, Еуроодақ алдағы уақытта келісімге қол жеткізуді көздеп отыр.

Еуропа көшбасшыларының кездесуі Брюссельде өтіп жатыр, ол 20 наурызға дейін жалғасады. Саммит басталмай тұрып, Венгрия премьер-министрі Виктор Орбан Украина "Дружба" құбыры арқылы ресейлік мұнай транзитін қайта бастамайынша, Киевке несие бермеу үшін барын салатынын мәлімдеген.

Киев қаңтар айының соңында құбырдың зақымдануына байланысты мұнай тасымалдауды тоқтатқанын мәлімдеді. Бұған жауап ретінде Будапешт дизель жеткізуді тоқтатып, 20 ақпанда ЕО несиесін бұғаттады.