Венгрия президенті өкілеттігін мерзімінен бұрын тоқтататынын мәлімдеді

Фото: Eurointegration.com.

Европейская правда мәліметінше, Президент өз үндеуінде өмір бойы заңды құрметтеуді басты қағида еткенін айтты. Оның сөзінше, бұл түзетулерді қабылдау жеке немесе саяси мүдделерден жоғары тұратын, ел үшін тағдыршешті ұлттық мәселе болған.

Шуйок мұндай жағдайда президенттің екі ғана таңдауы бар екенін айтты: конституциялық міндетін орындап, заңға қол қою немесе қол қоюдан бас тарту. Оның пікірінше, екінші жағдайда заң бұзылған болар еді.

«Мен құқықтық мүмкіндіктерім мен ар-ұжданымды жан-жақты таразылай отырып, негізгі заңда көзделген міндетімді орындадым. Бұл қолтаңба – республика президенті ретіндегі міндеттерімді адал атқарғанымның және қандай жағдайда да президент институтына деген құрметімнің белгісі», деді ол.

Шуйоктың өкілеттік мерзімі қол қойылған заң ресми басылымда жарияланғаннан кейінгі күні аяқталады.

Мажарстан премьер-министрі сайлау жасын 16-ға дейін төмендетуді ұсынды

Конституциялық түзетулер күшіне енгеннен кейін Венгрия президентінің міндетін парламент спикері Агнеш Форстхоффер уақытша атқарады. Ол бұл туралы Facebook парақшасында жазды.

Форстхоффердің айтуынша, Шуйоктың өкілеттігі 20 шілдеде аяқталады. Жаңа президент сайланғанға дейін мемлекет басшысының міндетін Ұлттық жиналыстың төрағасы атқарады.

«Бұл жауапты мемлекеттік міндетті Венгрияның негізгі заңы мен конституциялық тәртібіне сәйкес, лауазымның мәртебесін сақтай отырып және өз білімім мен тәжірибем аясында атқарамын. Өтпелі кезеңде маған жүктелген міндеттерді байыппен, бейтарап әрі ел мүддесін басшылыққа ала отырып орындауға бар күшімді саламын», деді ол.