Вице президенттің әйелі ұл босанды

ABC News телеарнасына сүйенген Aikyn.kz вице-президенттің отбасындағы қуанышпен бөліседі.

Вице-президент отбасылық қуаныштарымен X әлеуметтік желісіндегі парақшасында бөлісіп, ана мен нәрестенің жағдайы жақсы екенін айтқан.

«Бүгін таңертең (19 шілде) ұлымыз Алек Нил Вэнс дүниеге келді. Уша да, сәби де аман-есен. Балаларымыз да інілерін қуанышпен қарсы алды», – деп жазды ол.

Вице-президент сондай-ақ Уолтер Рид ұлттық әскери-медициналық орталығының және Ақ үйдің медициналық қызметкерлеріне кәсіби еңбегі үшін алғыс білдірді.

Джей Ди мен Уша Вэнс бұған дейін үш баланы тәрбиелеп келген отбасы. Олардың тұңғыштары – Юэн, одан кейін Вивек пен Мирабель дүниеге келген. Ерлі-зайыптылар төртінші сәби күтетінін биыл қаңтар айында жариялаған болатын. Олар Йель университетінің заң факультетінде танысып, 2014 жылы шаңырақ көтерген.

Джей Ди Вэнс – отбасы құндылықтары мен бала тәрбиесі тақырыбын жиі көтеретін саясаткерлердің бірі. Ол Трамп әкімшілігінің АҚШ-та туу көрсеткішін арттыруға бағытталған бастамаларын белсенді қолдап келеді. Былтыр Вашингтонда өткен «Өмір үшін марш» (March for Life) іс-шарасында сөйлеген сөзінде вице-президент:

«Мен Америкада балалардың көп болғанын қалаймын. Елімізде бақытты балалардың саны көбейгенін, ал жас отбасылардың оларды қуанышпен дүниеге әкеліп, тәрбиелеуге мүмкіндік алғанын қалаймын», – деген болатын.

Оның айтуынша, мемлекеттің басты міндеттерінің бірі – жас отбасыларға бала тәрбиелеуге қолайлы жағдай жасау. Маусым айында ABC News арнасына берген сұхбатында Уша Вэнс күйеуінің саяси болашағы туралы пікір білдірді.

«Мен саясаттағы мансапқа аса әуес адам емеспін. Ең бастысы – Джей Ди бақытты болып, қоғамға пайдалы іс атқарса болғаны. Қандай жолды таңдаса да, мен оны қолдаймын», – деді ол.

Сондай-ақ Уша Вэнс АҚШ президенті Дональд Трамппен жақынырақ танысқаннан кейін оның балаларға ерекше қамқорлықпен қарайтыны өзіне үлкен әсер қалдырғанын айтты.

«Оның әзіл-қалжыңы да ерекше. Бірақ ең бастысы – балаларға және отбасыларға деген шынайы жанашырлығы. Бұл оның адамдардың өміріне бейжай қарамайтынын көрсетеді», – деді АҚШ-тың екінші ханымы.

Екінші ханымның денсаулығы мықты, кішкентай Алек Нилдің бауы берік болсын!