X тің жаңа сервисі: Илон Маск қаржы нарығына өз платформасын шығарады

Компания иесі Илон Маск платформаның аудиториясын шамамен 600 млн белсенді қолданушы деп бағалайды. Жаңа сервис қаржылық қосымшалар нарығында маңызды орын алып, болашақта әмбебап суперқосымшаға айналуды көздейді.

Жоба тұжырымдамасы Қытайдағы WeChat сервисіне қарап жасалған. Бұл платформа байланыс, төлем және күнделікті қызметтерді біріктіреді. Бұған дейін тестілеуге қатысушылардың бірі X арқылы банктік карта көмегімен жанармай құю бекетінде төлем жасай алғанын хабарлаған.

Илон Масктың айтуынша, алдағы айларда шектеулі бета-тестілеу іске қосылып, кейін сервис бүкіл әлем пайдаланушыларына қолжетімді болады.

Жоба аясында платформа қаражат пен қаржылық құралдарды сақтауға арналған бірыңғай хабқа айналуы мүмкін.

2025 жылдың қаңтарында X Visa компаниясымен стратегиялық келісімге қол қойған. Бұл серіктестік физикалық және виртуалды банктік карталарды шығаруға мүмкіндік береді. Картада иесінің атымен қатар әлеуметтік желідегі никнеймді көрсету де қарастырылып отыр.

Бастапқы ұсыныстар қатарында жаңа пайдаланушыларға 25 доллар бонус, сатып алуларға кэшбэк, банк шотын байланыстыру мүмкіндігі және депозиттерге жылына 6%-ға дейін табыс қарастырылған. Болашақта криптовалюта операцияларын интеграциялау да мүмкін.

Сонымен қатар жоба халықаралық реттеу талаптарын, әсіресе Еуропалық комиссия деңгейіндегі талаптарды ескеруі тиіс. Өткен жылдың желтоқсанында Еурокомиссия X платформасын цифрлық қызметтер туралы заңды бұзғаны үшін 120 млн еуро айыппұлмен жазалаған. Негізгі шағымдар қатарында «көк белгі» жүйесінің жаңылыстыратын сипаты мен жарнама қызметінің жеткіліксіз ашықтығы бар.

Дегенмен АҚШ тарапынан бұл шешім сынға ұшырады. АҚШ вице-президенті Джей Ди Вэнс бұл шараларды платформаның цензурадан бас тартуымен байланыстырса, мемлекеттік хатшы Марко Рубио айыппұлды америкалық технологиялық компанияларға қысым көрсету деп бағалады.

Бұған дейін Илон Масктың байлығы 800 млрд доллардан асқан алғашқы адам болғанын жаздық.