Tesla өз көлігін ұшуға үйретті Илон Маск жаңа Roadster мүмкіндіктерін таныстырды

Tesla компаниясы Илон Маск алғаш рет осыдан 10 жыл бұрын мәлімдеген ұшатын Roadster моделінің мүмкіндіктерін көрсетті, деп хабарлайды Tengri Auto.

Ұшатын көліктер ұзақ уақыт бойы ғылыми фантастика мен комикстердің еншісінде болып келді, алайда Илон Маск Техас штатындағы Макгрегор қаласында мұндай технологияның жүзеге асқанын паш етті. Компанияның мәлімдеуінше, Roadster сағатына 100 шақырымға дейінгі жылдамдықты бір секундқа жетпейтін уақытта алып, кедергілердің үстінен тікелей ұшып өтуге қабілетті.

Компанияның X әлеуметтік желісінде жариялаған кадрларында Roadster қатар тұрған бес автокөлікке қарай бет алғаны көрінеді.

Кедергіге жақындаған сәтте ол көлік түбінде орналасқан соплолар арқылы сығылған газды сыртқа шығарып, ауаға көтеріледі де, кедергінің үстінен ұшып өтіп, трюк жасайды.

Айта кетерлігі, жазатайым оқиғалардың алдын алу үшін трюктерді орындау кезінде көлік ішінде адам болған жоқ.

Do a kickflip! https://t.co/DJ1Bq1yu8m

— Tesla (@Tesla) October 16, 2026

Автокөлік Tesla мен SpaceX компанияларының ынтымақтастығымен әзірленді. Сығылған ауаны пайдаланатын зымырандық үдеткіштерден бөлек, Roadster кузовының астына желдеткіштер жүйесі орнатылған. Ол көлікті жолға басып, жол жабынымен ілінісу сапасын арттыруы тиіс.

Real life, baby https://t.co/3QEqn18wig

— Tesla (@Tesla) October 16, 2026

Маск көліктің сериялық нұсқасы бұдан да жылдам болуы мүмкін екенін айтты. Өндірістің басталуы 2028 жылға жоспарланған. Сонымен бірге, кәсіпкер Roadster-ді пайдалануға барлық елдің жолдарында рұқсат берілмеуі мүмкін екенін де мойындады.

Ол сондай-ақ бұл көлік көптеген елдерде жалпы пайдаланымдағы жолдарда жүру үшін заңсыз деп танылуы мүмкін екенін де атап өтті.

Жаңа Tesla Roadster концептісін компания 2017 жылдың қарашасында көрсеткен болатын. Бастапқыда Tesla электрлі спорткарын жеткізуді 2020 жылы бастауды жоспарлаған, бірақ мерзімі бірнеше рет кейінге шегерілді.

Бұған дейін Илон Маск көлікті SpaceX технологиясымен жарақтандыру мүмкіндігі туралы да айтқан еді. Сөз сығылған газбен жұмыс істейтін зымырандық үдеткіштер жүйесі туралы болды, ол көліктің жылдамдығын арттыруға және ерекше маневрлер жасауға мүмкіндік береді.

2021 жылы The Joe Rogan Experience подкастында Маск Roadster-дің жер үстінде аз уақыт қалықтап тұра алатынын да жоққа шығармаған еді.

Бізді Google-дың негізгі дереккөздер тізіміне қосыңыз