Захарова шүйліккен Қазатомөнеркәсіптің таза пайдасы 807 млрд теңгені құрады

«Қазатомөнеркәсіптің» 2025 жылғы таза пайдасы 807 млрд теңгені құрап, 2024 жылмен салыстырғанда (2024 жылы 1,132 трлн теңге) 29%-ға төмендеді, деп хабарлайды Arasha.kz.

Компания таза пайданың азаюын өткен жылғы көрсеткіштердің жоғары болуымен түсіндірді. Бұған «Буденовское» БК» ЖШС-ін консолидациялаудан түскен біржолғы табыс, сондай-ақ бағамдық айырмадан болған шығын әсер еткен.

Біржолғы факторларды есептемегенде, компанияның түзетілген таза пайдасы 570,46 млрд теңгені құрап, іс жүзінде өткен жылғы деңгейде қалды (576,544 млрд теңге), деп жазды «Чёрный лебедь, рак и щука» телеграм арнасы.

«Қазатомөнеркәсіптің» консолидацияланған табысы 1%-ға азайып, 1,803 триллион теңгеге дейін төмендеді.

2025 жылы түзетілген EBITDA көрсеткіші 1,134 трлн теңгені құрап, өткен жылмен салыстырғанда 3%-ға өсті. Бұл, негізінен, бірлескен кәсіпорындар мен қауымдасқан компаниялардың қызмет нәтижелеріндегі үлестің артуына байланысты.

2025 жылы Қазақстан уран өндіруді 11%-ға арттырып, 25 839 тоннаға жеткізді. 2026 жылы 27 500–29 000 тонна уран өндіру жоспарлануда.

Есепті кезеңде спот нарығындағы орташа баға бір фунт уран тотығы үшін 14%-ға, яғни 73,54 долларға дейін төмендеді.

«2025 жылы жасалған келісімшарттардың жалпы көлемі әлі де нақты қажеттіліктерді толық жапқан жоқ. Осы орайда компания географиялық әртараптандыру стратегиясын іске асыруды жалғастыруда. Мұны 2025 жылы клиенттік базамызға Швейцария мен Чехияның қосылуы, Жапонияның ірі энергетикалық компаниясымен келісімшартқа отыру және Үндістанмен жаңа ұзақ мерзімді серіктестік орнатуымыз растайды», — деді «Қазатомөнеркәсіп» АҚ бас директоры Мейіржан Юсупов.

Естеріңізге сала кетейік, Франция президенті Эммануэль Макронның ресейлік уранға тәуелділікті азайтып, Қазақстан мен Өзбекстан уранына көшу қажеттігі туралы сөзіне қатысты Ресей СІМ ресми өкілі Мария Захарова былай деп мәлімдеген болатын: 

«Біз ұжымдық Батыстың Орталық Азия нарығына, нақты осы табиғи ресурстар нарығына қол жеткізуге тырысып жатқанын көріп отырмыз. Олар көбіне нарықтық емес әдістермен әрекет етіп, сонымен бірге біздің аймақ мемлекеттерімен ынтымақтастығымызға сызат түсіруді көздейді. Біз өз ынтымақтастығымызды құқық, екіжақты уағдаластықтар негізінде, ең бастысы — өзара құрмет пен бір-біріміздің мүдделерімізді ескеру негізінде құрамыз... Батыс болса колониялық типтегі үстемдік позициясынан әрекет етеді. Біздің өзара іс-қимылымыздың негізі - теңдік пен мүдделерді есепке алу. Біз Қазақстан және Өзбекстанмен осы елдерде заманауи атом энергетикасы саласын құру және АЭС салу жобаларын жүзеге асыру бойынша ынтымақтастықты дәл осылай қалыптастырамыз».